रोटरी क्लब बालुवाटार र कामनपा ३ को सहकार्यमा मन्दिर तथा पार्क निर्माण

रोटरी क्लब अफ मातृभूमि बालुवाटारले काठमाडौं महानगरपालिका वडा नं ३ को सहकार्यमा मन्दिर जिर्णोद्धार र पार्क निर्माण गरेको छ । क्लब र वडाका अध्यक्ष द्वय अनुज थापा र दिपक केसी एवं रोटरी इन्टरनेसनल डिस्ट्रिक ३२९२ का असिस्टेन्ट गभर्नर हरिओम ध्वज जोशीले संयुक्त रुपमा उक्त मन्दिर र परिसरमा रहेको पार्कको समुद्घाटन गरेका हुन् । उक्त मन्दिर परिसरमा समय, मिति र तापक्रममापक डिजिटल डिस्प्ले बोर्डपनि राखिएको छ ।

यो सहयोगका लागि कार्यक्रमका प्रमुख अतिथि वडाध्यक्ष दिपक केसीले रोटरी परिवारलाइ धन्यबाद दिए । स्थानीय सरकार समुदाय सँगको साझेदारीमा सहकार्य गर्न सधै तत्पर रहेको जनाउँदै उनले आगामी दिनमा समेत यस्ता सार्वजनिक हितका कामले निरन्तरता पाउने बताए । खुल्ला र आराम गर्ने ठाउँ एकदमै कम रहेको काठमाडौंमा यस्ता कार्यले वडाबासीहरुको मन भुलाउनुका साथै वातावरण राम्रो बनाउन सहयोग पुग्ने उनको भनाई थियो ।

रोटरी भनेकै समाज र समुदायका हितका लागि खडा संस्था भएको गभर्नर जोशीले बताए । यसरी समुदायको हितमा काम गर्न पाएकामा खुशी लागेको उनको धारणा थियो । बालुवाटार क्षेत्रका मन्दिर र परिसरमा सुन्दर पार्क बनाउन पाउँदा थप उत्साह थपिएको रोटरी बालुवाटारका अध्यक्ष अनुज थापाले बताए ।

यस्ता कार्यले समाजसेवा गर्न जागरुक गराउने क्लबका पूर्व अध्यक्ष बिष्णुहरि दाहालले बताए । उक्त पार्क दुर्गेश न्यौपानेको संयोजकत्वमा निर्माण गरिएको हो । क्लबका सचिव सुदर्शन बिडारीद्वारा संचालित कार्यक्रममा रोटरी बालुवाटारका चार्टर प्रेसिडेन्ट निगम हुमागाई, पूर्व अध्यक्षहरु बिनोद अधिकारी, जयराम सिग्देल, उपाध्यक्ष सुबिध्या खनाल दाहाल, कोषाध्यक्ष निर्मल ढकाल, सदस्य दिपेन्द्र केसी लगायत वडाबासीहरुको उपस्थिति थियो ।