टेकु अस्पतालको निर्देशकमा डा. अनुप बास्तोला

शुक्रराज ट्रपिकल तथा सरुवा रोग अस्पताल टेकुको निर्देशकमा डा. अनुप बास्तोला नियुक्त भएका छन् । स्वास्थ्य तथा जनसंख्या मन्त्रालयले सोमबार सरुवा रोग विशेषज्ञ डा. बास्तोलालाई निर्देशकमा नियुक्त गरिएको मन्त्रालयका प्रवक्ता डा. कृष्ण पौडेलले जानकारी दिए ।

डा. बास्तोला यसअघि अस्पतालको प्रवक्ताको भूमिकामा थिए । उमेरहदका कारण डा. सागरराज भण्डारीले अवकास लिएसँगै डा. बास्तोला निर्देशकमा नियुक्त भएका हुन् । डा. बास्तोला सन् २००८ यता यस अस्पतालमा कार्यरत छन् ।

आजै निर्देशकको जिम्मेवारी सम्हालेसँगै डा. बास्तोलाले यस सरुवा रोग अस्पताललाई अझै व्यवस्थित बनाएर आम नागरिकलाई सहज रुपमा उपचार पाउने गरी व्यवस्थापन गर्ने बताए । ‘अहिले महामारीको बेलामा मात्र यस अस्पतालालाई सम्झिइन्छ,’ उनले भने, ‘अब सामान्य अवस्थामा पनि आमनागरिकले सरुवा रोग अस्पताल टेकुलाई सम्झने बनाउनेछु ।’