के कोभिड-१९ को खोप लगाएपछि शरीर चुम्बकीय बन्छ ?

अहिले सामाजिक सञ्जालमा कोरोना विरुद्धको खोप लगाएपछि शरीरमा भाँडा टाँसिन थालेको खबर भाइरल भइरहेको छ । नेपालमा पनि केही दिनअघि मात्रै भेरोसेलको पहिलो मात्रा खोप लगाएकी ६० वर्षीया संगिता तिमीलाको चम्चा र साँचो टाँसिएको खबर सामाजिक सञ्जालमा भाइरल बनिरहेको छ ।

समाचार मात्रै होइन केही सञ्चारमाध्यमहरुले त यसको भिडियो पनि सामाजिक सञ्जालमा राखेका थिए । जसपछि कोरोना खोप लगाउने मानिसहरुमा त्रास उत्पन्न भएको छ ।

यसैबीच स्वास्थ्य तथा जनसंख्या मन्त्रालयले आज कोरोना खोपले कुनै पनि व्यक्तिको शरीर चुम्बकीय नबन्ने बताएको छ । कोरोना भाइरसको खोपमा कुनै पनि धातु र माइक्रोचिपहरु नहुने भन्दै मन्त्रालयले यस्ता अफवाहको पछि नलाग्न अनुरोध गरेको छ ।

कोभिड १९ को खोप सुरक्षित र प्रभावकारी रहेको जानकारी गराउँदै मन्त्रालयले यसले स्वास्थ्यमा कुनै प्रतिकूल असर नगर्ने पनि जनाएको छ ।