नेपालको पर्यटन प्रर्वद्धन हेतु बेलायतमा ‘हाइक फर नेपाल’

बेलायतमा नेपालको पर्यटन प्रवर्द्धन हेतु वर्षेनी हुँदै आएको ‘हाइक फर नेपाल’ यसपटक पनि आयोजना गरियो । पोखरेली मञ्च यूकेले सधै झै वी वील राइज फाउन्डेसन र नेपाली सोसाइटी ब्रेकन वेल्ससँगको सहकार्यमा जुलाई २६ (शुक्रबार) देखि २८ (आइतबार) सम्म कार्यक्रमको छैठौं संस्करणको आयोजना गरेको हो ।

पर्यटन प्रर्वद्धनसँगै आफ्नो मातृभूमिको सम्झनामा प्रारम्भ गरिएको यस पदयात्रा अभियानले बेलायतमा पर्वको रुप लिइसकेको छ । मञ्चले सन् २०१७ देखि प्रत्येक वर्ष आयोजना गर्दै आएको पदयात्रा कोभिड–१९ का कारण दुई वर्ष रोकिएपनि त्यसपश्चात यसले पुनः निरन्तरता पाएको छ । सहरको कोलाहलमय वातावरणबाट टाढा प्रकृतिको काखमा रमाउनेहरुको लागि यो कार्यक्रम विशेष बन्दै गएको छ ।

सन् २०१५ मा नेपालमा गएको महाभूकम्पले ठूलो जनधनको क्षति गर्यो । मातृभूमिका लागि विदेशमा रहेका नेपालीले पनि केही गर्नुपर्छ भन्ने लागेर पदयात्रा शुरु गरिएको कार्यक्रमका संयोजक तथा संचालक मानप्रसाद गुरुङले बताए । गुरुङ संस्थाका पूर्व अध्यक्ष हुन् । पदयात्रा थलो वेल्स जर्ज एभरेष्टको जन्मभूमि पनि हो । सन् १८५७ मा यिनैको टोलीले सगरमाथाको सर्वेक्षण गरेको थियो । पछि सगरमाथाको नाम नै एभरेष्ट नामाकरण गरियो ।

हाइक फर नेपालको पहिलो दिन सहभागीहरु ब्रेकनको क्याम्पिङ साइटमा पुगेका थिए । इभेन्टमा आउटडोर क्याम्प, सेल्फ कुकिङ, नेपाली खानाको स्टल, लाइभ संगीत, डिजे शो तथा बालबालिकाका खेल मुख्य आकर्षण थिए । दोस्रो दिन स्थानीय पिक हिलमा सामूहिक हाइकिङ गरिएको थियो । कार्यक्रममा सहभागीहरुले ब्रेकनमा नेपालीहरुको पहलमा निर्माण हुंदै गरेको नेपाली भिलेजको अवलोकन भ्रमण समेत गरेका थिए । आउटडोर क्याम्पिङ, सेल्फ कुकिङ, नाचगान, साथीभाइ र परिवार बीचको जमघटले हाइक फर नेपाल चर्चित कार्यक्रम बन्दै गएको छ ।

मञ्चका उपाध्यक्ष गंगा प्रसाद गुरुङ (पवित्रा) ले यस कार्यक्रम आयोजनाको उद्देश्य नेपालको पर्यटन प्रवर्द्धनका लागि मात्र नभएर स्थानीय समुदायसँग सांस्कृतिक आदानप्रदान गरिनु पनि रहेको बताए । कार्यक्रममा लन्डनस्थित नेपाली दूतावास, नेपाल पर्यटन बोर्ड, गैरआवासीय नेपाली संघ यूके साथै ग्रेटर रेडिङ नेपाली सोसाइटी, रामबजार सोसाइटी यूके र बगर भाइखलक यूकेसहितका संस्थाको पनि सहयोग रहेको थियो । भूकम्पपछि थलिएको नेपालको पर्यटन प्रवर्धन हेतु वी विल राईज फाउण्डेसनको आयोजनामा सन् २०१६ मा पहिलोपटक हङकङबाट ‘हाइक फर नेपाल’ को सुरुवात भएको थियो ।