मिलनको क्यामरामा विश्वकै दुर्लभ पक्षी

चितवन सौराहाका वाइल्डलाइफ फोटोग्राफर मिलन तामाङले ललितपुरको फूलचोकी पुगी विश्मै दुर्लभ र लोपोन्मुख पक्षीहरु क्यामरामा कैंद गरेका छन् । तामाङले हालसम्म ४ सय ५० बढी प्रजातिका चराहरु क्यामरामा कैद गरिसकेको बताए । उनले यी चराहरु चितवन, नवलपरासी, बर्दिया, पोखरा, काठमाडौँ, दामन, कोशी, हेटौडा लगायतका क्षेत्रहरुमा खिचेका हुन् । चरा भनेपछि हुरुक्कै हुने तामाङ तस्बिर खिच्नकै लागि हालै काठमाडौँ आएका थिए ।

फूलचोकी क्षेत्र विश्वमै दुर्लभ सूचीमा रहेका पक्षीहरूको बासस्थान हो । यहाँ राष्ट्रियस्तरमा खतराको सूचीमा रहेका लोपोन्मुख वन चाहा, डङ्गर गिद्ध, लघु महाचिलसहित नेपालका ९ वटा संरक्षित पक्षीमध्ये मुनाल समेत भेटिने गरेको छ । नेपालका मध्यपहाडी भेगमा पाइने अधिकांश चराहरू गोदावरी–फूलचोकीमा भेटिन्छन् । फूलचोकीमा ३५९ प्रजातिका पक्षी अभिलेख भएका छन् । नेपालका सीमित क्षेत्रमा मात्र पाइने भनेर अभिलेख भएका ढिकुरे भ्याकुर, काँडे भ्याकुर, वन चाचर र चस्मे चरीको विचरण क्षेत्र समेत हो गोदावरी ।

तस्बिर : मिलन तामाङ/मेरोलाइफस्टाइल डट कम