बुटवलमा यःमरि महोत्सव (फोटो फिचर)

नेवार समुदायले मनाउने यःमरि पुन्हि अर्थात योमरी पूर्णिमा र ज्यापु दिवस आज मुलुकभर उल्लासका साथ मनाईदैछ । हरेक वर्ष धान्य पूर्णिमाको दिनमा काठमाडौं उपत्यका र आसपासका नेवार समुदायले योमरी पुन्हिः मनाउँछन । विगतमा मुख्यतयाः राजधानी केन्द्रित यस्त कार्यक्रमहरुले मोफसलमा पनि निरन्तरता पाउन थालेको छ । भिमसेन नेवाः समाज, भिमसेन नेवाः मैजु पुच बुटवलले सोमबार यःमरि पुन्हि मनाएको छ । विगतमा सभाहलमा गरिने यो कार्यक्रम पहिलोपटक महोत्सवका रुपमा सडक छेउ आयोजना गरिएको थियो । योमरी अचार लगायत राखिएको स्टलमा नेवार समुदाय सँगै गैरनेवार विभिन्न जातजातिहरुको उल्लेख्य सहभागिता थियो । करिब तीनसयले योमरी स्वाद लिएका थिए । ढिलोगरी पुगेका धेरैलाई योमरी चखाउन नपाएको आयोजक संस्थाले जनाएको छ । धेरैले परिकार मिठो लागेको बताउँदै बनाउँने विधीबारे जिज्ञासा राखेका थिए ।

नेपाल भाषामा ‘यः’ भनेको मनपर्ने र ‘मरि’ भनेको रोटी वा मिठाई भन्ने अर्थ लाग्छ । यःमरी लाई पञ्चतत्वको रुपमा पनि स्वीकार गरिन्छ । यःमरीमा धरतीको रुपमा चामलको पिठो, अग्नीको रुपमा चाकु, जलको रुपमा पानी, आकाशको रुपमा खाली ठाउँ र वायुको रुपमा तिललाई लिइन्छ । यःमरी खाइने भएकोले यसलाई यः मरि पुन्ही ((यः मरि पूर्णिमा) पनि भन्ने गरिन्छ । नेवार संस्कृतिमा यःमरिको विशेष महत्त्व छ । धनसम्पत्ति, बृद्धि र धनधान्यले भरिपूर्ण हुने जनविश्वासले नेवार समुदायमा यःमरि पुन्हीका दिन सबैले यःमरि सहित विभिन्न देवी देवताको पूजा गरी दान गर्ने गरिन्छ ।

सोही समारोहमा बुटवल उप–महानगरपालिका वडा नम्बर ३ ले भिमसेन नेवाः मैजु पुचलाई पचास हजार रुपैयाँको नेवारी धिमे बाजा र झ्याली सहयोग स्वरुप प्रदान गरेको थियो । यसका लागि मैजु पुचकी अध्यक्ष बबिता श्रेष्ठले वडालाई धन्यवाद दिदै खुशी व्यक्त गरिन् ।

वडा नम्बर ३ का सदस्य हरिनारायण मिश्राको प्रमुख आतिथ्यतामा आयोजित कार्यक्रमकी विशिष्ठ अतिथि वडाकै सदस्य पवित्रा श्रेष्ठ थिइन् । विष्णुमाया श्रेष्ठको संयोजकत्वमा आयोजित कार्यक्रमको संचालक भिमसेन समाजका सचिव विष्णु श्रेष्ठ र नेवाः मैजु पुचकी महासचिव अर्पणा श्रेष्ठले गरेकी थिइन । कार्यक्रममासंस्था भिमसेन सेवा समाजका अध्यक्ष सहदेव श्रेष्ठको जन्मदिन समेत मनाएर रमाइलो गरिएको थियो ।