जब युवक खेल चलिरहेकै बखत मेसीको अटोग्राफ लिन मैदान छिरे

सुपरस्टार फुटबल खेलाडी लियोनल मेसीको १० नम्बर जर्सीमा ठाँटिदा गौरव अनुभूति गर्ने युवाहरूको लर्को हाम्रै नेपाली समाजमा पनि कम छैन । विश्वकप फुटबल ताका सबैभन्दा बढी बिक्री हुने अर्जेन्टिनी जर्सी हो नम्बर १० ।

मेसी अर्थात् किर्तिमानका खाद । विश्वकै सर्वाधिक चर्चित र उत्कृष्ट खेलाडी कहलिएका मेसीको खेल प्रत्यक्ष हेर्ने र यिनलाई भेट्ने चाहना नभएका फुटबलप्रेमी विरलै होलान् । विश्वकप खेलिरहँदा कैयौँ दर्शकदिर्घाको भिडमा बारम्बार एउटै नाउ गुन्जिरहन्छ ‘मेसी–मेसी’ । मैदानमा अन्य खेलाडी पनि हुन्छन् । तर मेसीका अघि अरू सबै फिक्का बने । मेसी मैदानमा भएपछि गोलको आस नहुने कुरै हुँदैन ।

एकपटक हङकङेली मैदानमा मेसीप्रतिको क्रेज कतिसम्म देखियो भने एक चिनिया युवक खेल चलिरहेकै बखत सुरक्षाकर्मीका घेरा तोडेरै उनको अटोग्राफ लिन मैदान छिरे । खेल एकाएक रोकियो । सुरक्षाकर्मीले रोक्दारोक्दै मेसी छेउ पुगेका उनले आफूले लगाएको अर्जेन्टिनी जर्सीमा अटोग्राफ लिएरै छाडे । त्यसको केही समयपछि उसैगरी मैदान प्रवेश गरेका अर्का युवक भने मेसी छेउ नपुग्दै समातिए ।

यी त प्रतिनिधि घटना मात्र भए । यी युवा जस्ता हजारौँ फुटबलप्रेमी मैदानमा हुन्छन् जो मेसीसँग कुम जोराएर तस्बिर खिच्न र अटोग्राफ लिन चाहन्छन् । तर हरबखत सुरक्षाकर्मी तगारो बनेपछि यिनका सपना त्यसै तुहिन्छन् ।

विश्वकै दोस्रो महँगा फुटबल खेलाडी मध्येका यिनको वार्षिक आम्दानी १३० मिलियन अमेरिकी डलर रहेको फोब्र्समा उल्लेख छ । स्पेनेली बार्सिलोना क्लबबाट खेल्ने मेसीलाई फुटबल प्रेमीहरू विख्यात खेलाडी डियागो म्याराडोनाको अवतार पनि भन्ने गरेका छन् । ‘मेसीको क्षमता असीमित छ, मलाई लाग्छ उ सँग सबै चीज छ जसले उसलाई अर्जेन्टिनाकै महान् खेलाडी बनाउन सक्छ’, म्याराडोनाले उनका बारे यसो भनेका थिए । ‘फुटबल आइकनको कुनै ठोस परिभाषा हुने थियो भने त्यो अरू केही नभएर मेसी हुने थिए’, उनीबारे सम्चार माध्यमहरूमा लेखिएका छन् ।

यो पनि…
९० मिनेट पूरा हुनुअघि नै रोनाल्डो मैदानबाट बाहिरिएपछि
मैदान छिर्नुअघि खेलाडीको अनौठा हरकत : चुम्बन गर्नेदेखि नुन छर्कनेसम्म