सुरु भयो नाडा ईभी एक्स्पो २०२२
नाडा अटोमोबाइल्स एशोशियसन अफ नेपालले आजदेखि ‘नाडा इभी एक्स्पो २०२२’ शुरु गरेको छ । नाडाले दसैंलाई मध्यनजर गर्दै काठमाडौँको भृकुटीमण्डपमा एक्स्पो आयोजना गरेको हो ।
नाडाले नेपालमा पहिलो पटक विद्युतीय सवारी साधन, पार्टपुर्जाहरू वित्तीय सेवा एवम् अन्य सम्बन्धित सरोकारवाला संघ–संस्थाहरूको उपस्थितिमा प्रदर्शनी गरेको हो । अर्थमन्त्री जनार्दन शर्माले उद्घाटन गरेको यो एक्स्पोमा नेपाल विद्युत प्राधिकरण सहयोगी संस्थाको रूपमा सहभागी भएको छ । एक्स्पोमा विभिन्न कम्पनीका विद्युतीय सवारीसाधनहरू प्रदर्शनीमा राखिएको छ ।
एक्स्पो समितिका सभापति अनुप बरालका अनुसार एक्स्पोमा ५१ वटा स्टल राखिएको छ । जसअनुसार चारपाँग्रे विद्युतीय सवारी साधनको ७, दुईपांग्रेको १६, टायरको ३, ब्याट्रिको २, अटोपार्टस् ५, ग्यारेज उपकरण र वित्तीय निकायसहित २४ वटा स्टल राखिएको छ ।
असोज ९ गतेसम्म चल्ने एक्स्पोमा ४० हजार बढीको उपस्थिती हुने आयोजकको भनाइ छ । उक्त अवधिभर एक्स्पोमै गाडी किन्न र बुक गर्न पाइनेछ । विभिन्न कम्पनीले चाडबाडलाई मध्यनजर गर्दै गाडी, मोटरसाइकल किन्दा नगद छुट अफर राखेका छन् ।
गाडी किन्दा वित्तीय सुविधा पनि एक्स्पोमै उपलब्ध रहेको नाडाले जनाएको छ । त्यस्तै, सडक सुरक्षाका बारे जानकारी दिन एक्स्पोमा ट्राफिक प्रहरीको छुट्टै स्टल राखिएको छ । ईभीसम्बन्धी ज्ञान आदन–प्रदान गर्न ‘नाडा ईभी चौतारी’ सेमिनार सञ्चालन हुने सभापति बरालले बताए । त्यसमा इलेक्ट्रिक गाडीहरूका सम्बन्धमा विद्यमान नीति नियमबारे चर्चा गरिने छ ।
प्रत्येक वर्ष दसैंको मुखमा नाडा अटो शो हुँदै आएको थियो । दुई वर्षदेखि कोभिडका कारण अटो शो हुन नसकेको नाडाले जनाएको छ । एक्स्पोको शिर्ष प्रायोजक सिएट टायर रहेको छ भने सहप्रायोजक शिखर इन्स्योरेन्स रहेको छ । यस्तै डिजिटल पेमेन्ट पार्टर खल्ती एप रहेको छ ।
याे पनि …
असोज ६ देखि नाडा इभि एक्स्पो २०२२
दुई वर्षपछि हुँदै ‘नाडा अटो शो’
