बेलायतकी महारानी एलिजाबेथ द्वितीयको निधन

बेलायतकी महारानी एलिजाबेथ द्वितीयको निधन भएको छ । स्थानीय समय अनुसार बिहीबार उनको ९६ वर्षको उमेरमा निधन भएको हो ।

बेलायतमा सबैभन्दा लामो समय शासन गर्नेमा एलिजाबेथको नाम पहिलो नम्बरमा आउँछ । उनले बेलायतमा ७० वर्ष शासन गरेकी थिइन् ।

एलिजाबेथ सन् १९५२ मा बेलायतको महारानी बनेकी थिइन् । उनको आफ्नो शासनकालमा व्यापक सामाजिक परिवर्तन आएको थियो ।

एलिजाबेथको निधनपछि उनको सबैभन्दा जेठो छोरा तथा वेल्सका पूर्व राजकुमार चाल्स बेलायतको नयाँ राजा हुनेछन् ।

‘महारानीको निधन आज बालमोरलमा भएको छ,’ बकिंघम प्यालेसले एलिजाबेथको निधन भएपछि जारी विज्ञप्तिमा भनेको छ ।

एलिजाबेथले आफ्नो कार्यकालमा बेलायतमा १५ जना प्रधानमन्त्री देखेकी थिइन् । सबैभन्दा पहिला उनले सन् १८७४ मा जन्मेका तत्कालिन प्रधानमन्त्री विन्स्टन चर्चिलसँग काम गरेकी थिइन् । पछिल्लो पटक उनले चर्चिल जन्मेको १०१ वर्षपछि जन्मेकी अर्थात सन् १९७५ मा जन्मेकी लिज ट्रसलाई प्रधानमन्त्रीको रुपमा देखेकी थिइन् ।

एलिजाबेथको जन्मको सन् १९२६ अप्रिल २१ का दिन लण्डनमा भएको थियो । उनको जन्मको नाम एलिजाबेथ एलेक्सान्ड्रा मैरी विन्डसर थियो ।

यसैबीच प्रधानमन्त्री शेरबहादुर देउवाले बेलायतकी महारानी एलिजाबेथ द्वितीयाको निधनप्रति दुःख व्यक्त गरेका छन्।

रानी एलिजाबेथको निधनले नेपाल र नेपाली जनताले आफूलाई माया गर्ने एक व्यक्तित्व गुमाएको देउवाले उल्लेख गरेका छन्।​ ‘रानीका सन १९६१ र सन १९८६ मा भएका दुई राजकीय भ्रमणलाई नेपालमा सादरपूर्वक स्मरण गरिन्छ,’ देउवाले एलिजाबेथका नेपाल भ्रमणको चर्चा गर्दै ट्विटमा भनेका छन्।

एलिजाबेथ तत्कालीन राजा महेन्द्रको निम्तोमा सन् १९६१ मा र राजा वीरेन्द्रको राज्याभिषेकमा सन १९८६ मा नेपालको राजकीय भ्रमणमा आएकी थिइन्।

यो पनि…
चर्चित भारतीय गायिका लता मंगेशकरको निधन
जापानका पूर्व प्रधानमन्त्री अवेको निधन