के तपाईँको कोठामा रङको संयोजन मिलेको छ ?

धेरैजस्तो मानिसहरू आफ्नो घरमा रङको छनोट गर्दा सेतो, सादा तथा हल्का रङ छान्ने गर्छन् । सोही रङ भित्री कोठाहरूमा पनि लगाउने गर्छन् । एक हिसाबले हेर्दा यसो गर्दा घरको सजावट गर्न सजिलो पनि हुन्छ । घर सिम्पल पनि देखिन्छ । तर कहिलेकाहीँ अलिकति बोल्ड भएर रङ छानियो भने घरलाई अझ धेरै सुन्दर तथा आकर्षक बनाउन सकिन्छ ।

लिभिङ रुम

घरभित्र छिर्ने बित्तिकैको पहिलो कोठा भनेको लिभिङ रुम हो । यो कोठालाई आकर्षक बनाउन न्युट्रल रङ प्राथमिकता दिनुपर्छ । सेतो रङलाई छान्दा पनि फरक पर्दैन । यस्तो रङले कोठा ठुलो र फराकिलो देखिन्छ ।

बेडरुम

बेडरुम भनेको आराम गर्ने र तरो ताजा महसुस गर्ने कोठा हो । बेडरुमको रङले तपाईँको मुडमा पनि प्रभाव परिरहेको हुन्छ । यो कोठामा हरियो रङको प्रयोग गर्नु प्रभावकारी हुन्छ । हरियो रङले तपाईँलाई शान्ति प्रदान गर्छ र आराम र ताजगी पनि महसुस हुन्छ ।

डाइनिङ रुम

तपाईँहरूले याद गर्नु भएको होला, धेरैले आफ्नो डाइनिङ रुममा डाइनिङ टेबल र भित्ताको रङ रातो र पहेँलो कलरको कम्बिनेसनबाट बनाएका हुन्छन् । डाइनिङ रुममा रातो कलर लगाउँदा यसले भोक बढाउने गर्छ । यो रङले घरका सदस्यहरू सँगै भएको भावना पनि बढाउने गर्छ ।

रिडिङ रुम

नीलो रङले फोकस र कन्स्ट्रक्सन बढाउने काम गर्छ । यदि तपाई घरमा सानो अफिस अथवा रिडिङ रुम बनाउँदै हुनुहुन्छ भने त्यो एरियाको भित्ताहरूमा नीलो रङ प्रयोग गर्न सक्नु हुन्छ ।

किचन

घरको भान्सा कोठामा पहेँलो रङको प्रयोग गर्दा राम्रो प्रभाव परेको हुन्छ । पहेँलो रङलाई तातो रङ पनि भनिन्छ । साथै, आनन्द तथा उत्साहको रङ पनि भनिन्छ । भान्सा कोठा भनेको त्यस्तो ठाउँ हो, जहाँ परिवारका सबै सदस्यहरू एकै ठाउँमा जम्मा हुन्छन् । त्यसैले भान्सा कोठालाई पहेँलो रङले सजाएर न्यानोपनले भर्नुहोस् ।

यो पनि…
घरमा रोप्नुहोस् यी औषधीय गुण भएका बिरूवाहरू
पुरानो सामानबाट नयाँ सजावट