न्याय माग्दै निहारिका (फोटो फिचर)

कलिलो उमेर, काखमा दुधे बालक अनि कुमारी आमा ! उनी हुन् महोत्तरीको जलेश्वर नगरपालिका–८ की निहारिका राजपुत । उनको बिहे भएको छैन । तर, उनी आमा हुन् । उनी आफूलाई ‘कुमारी आमा’ भनेर चिनाउँछिन् ।

न्याय माग्दै निहारिका राजपुत पुनः आमरण अनशनमा बसेकी छन् । ‘कुमारी आमा’को रुपमा चिनिएकी उनी आफूसँग भएको सम्झौता कार्यान्वयनको माग गर्दै आमरण अनशनमा बसेकी हुन् । यसअघि उनको आमरण अनशन ५ बुँदे सहमति गर्दै गृहमन्त्री बालकृष्ण खाणले जुस खुवाएर तोडाएका थिए । तर, आफूले अहिलेसम्म न्याय नपाएको भन्दै उनी पुन आमरण अनशनमा बसेकी हुन् ।

दुई वर्षको बच्चासहित आमरण अनशनमा बसेकी उनलाई अनशनस्थत सिंहदरवारको दक्षिण गेटबाट प्रहरी नियन्त्रणमा लिएको छ ।

१७ वर्षको उमेरमा धनुषाको क्षीरेश्वरनाथ नगरपालिका–३ बस्ने श्रेष्ठले बलात्कार गरेको भन्दै उनले आरोपित पुरुषलाई कारबाहीको माग गर्दै आमरण अनशन बसेकी हुन् । बच्चा जन्मिएपछि ती पुरुषले छाडेको उनको भनाइ छ । जिल्ला अदालतले आरोपीलाई सफाइ दिएपछि जनकपुर उच्च अदालतमा पुनरावेदन गरेकी उनले हालसम्म न्यायको अनुभूति गर्न नसकेको बताउँदै आएकी छन् ।

उच्च अदालतले मुद्दाको किनारा नलगाउँदा आफूमाथि थप अन्याय भएको उनले बारम्बार गुनासो गर्दै आएकी छन् ।

यो पनि…
शिल्पीमा ‘हिउँको पृथ्वी यात्रा’ (फोटो फिचर)
यसरी मनाइयो ‘नेपाल गौरव यात्रा’ (फोटो फिचर)