नेत्रधामले गर्यो निशुल्क स्वास्थ्य जाँच र उपचार
स्वास्थ्य जनचेतना दिने उद्देश्यले एक दिने निशुल्क स्वास्थ्य जाँच तथा उपचार शिविर सम्पन्न भएको छ ।
शनिवार गुरुद्वारा गुरुनानक सत्सङ्ग, कुपण्डोलमा आयोजित उक्त स्वास्थ्य शिविर नेत्रधाम फाउण्डेशन, नेत्रधाम आई केयर प्रालि र ललितपुर महानगरपालिका वडा नम्बर १० कार्यालय,कुपण्डोल द्वारा संचालन गरिएको थियो ।
बिहान ८ बजेबाट संचालित उक्त शिविर दिउँसो ३ बजेसम्म गरिएको थियो । शिविरमा करिब पाँच सयभन्दा बढी सर्वसाधारणले स्वास्थ्य परिक्षण गराएका थिए ।
आँखा जाँचका लागि डा. संयम बजिमय र डा.संगीता श्रेष्ठको टोली सक्रिय थिए । त्यसैगरी नाक, कान, घाँटीका लागि डा. लुना माथेमाको टोली र मधुमेह थाईराइडका लागि फिजिसियन डा. दिपक मल्ल पनि सहभागी थिए ।
शिविरमा ३०५ जनाले आँखा जाँच, ११९ जनाले नाक/कान र घाँटी परिक्षण र ८२ जनाले मधुमेह,थाइराइड सम्बन्धी स्वास्थ्य जाँच गराएका थिए । शिविरमा निशुल्क मधुमेहको जाँच पनि गरिएको थियो । रगत जाँचका लागि विशेष छुटको पनि व्यवस्था थियो ।
उक्त स्वास्थ्य शिविरको लागि आर्थिक सहयोग नेत्रधाम फाउण्डेशनले गरेको थियो । स्वास्थ्य उपकरण, औषधि, चश्मा र प्राविधिक सहयोग नेत्रधाम आई केयरको तर्फबाट व्यवस्था गरिएको थियो । स्थलगत सहयोग र स्वास्थ्य स्वंयसेवक परिचालन भने वडा कार्यालय र गुरुद्वाराबाट भएको थियो ।
आँखा,स्वास्थ्य जाँचपछि आवश्यक थप उपचारको लागि बिरामीहरुलाई नेत्रधाम आई केयर सेन्टरमा व्यवस्था मिलाइएको थियो ।
नेत्रधाम फाउण्डेशनका अध्यक्ष तथा नेत्रधाम आई केयरका चिकित्सक डा.संयम बजिमयको नेतृत्वमा संचालन भएको उक्त स्वास्थ्य शिविर ललितपुर १० नम्बर वडाका आँखा रोगी तथा मधुमेह भएका बिरामीहरु र सर्वसाधारणलाई निशुल्क स्वास्थ्य सेवा दिन लक्षित गरिएको थियो ।
डा. बजिमयले स्वास्थ्य सबैको मौलिक अधिकार भएकोले नेत्रधाम फाउण्डेशनले सरकारी तथा गैरसरकारी संस्थासंगको समन्वयमा आगामी दिनमा पनि सामुदायिक स्वास्थ्य कार्यक्रमहरु ल्याउने प्रतिबद्धता जनाएका थिए ।
यो पनि…
यसकारण नेत्रधाम विश्वासिलो बन्यो (भिडियो पनि)
दूधमा घ्यू मिसाएर पिउँदा के हुन्छ ?
