बेहुली होइन, यहाँ विवाहपछि बेहुला अन्माइन्छ !

तपाईले विवाह गरेपछि बेहुली अन्माएको देख्नुभएको होला । किनभने हाम्रो गाउँ,ठाउँमा विवाहपछि बेहुली अन्माइन्छ र बेहुलालाई जिम्मा लगाइन्छ । तर छिमेकी देश भारतमा बेहुली नभएर बेहुलालाई विवाहपछि अन्माएर विदा गरिने परम्परा रहेको छ । यो प्रथा भारतको मेघालयको खासी जनजातिमा विद्यमान छ ।

यो एक मातृसत्तात्मक समाज हो । यो जनजातिले वंशीय परम्परा आमाको नाममा चलाउँछन् । यो समुदायमा आमाबुबाको सम्पत्तीमा पहिलो अधिकार छोरीको हुन्छ । केटाकेटीलाई आफूलाई मन परेको मानिस चुन्ने अनुमति दिइन्छ ।

यो समुदायमा कुनै पनि प्रकारको दाइजो दिने परम्परा छैन । महिलाहरु आफ्नो इच्छाअनुरुप जुन कुनैबेला पनि विवाह तोड्न सक्दछन् । खासी मानिसको संख्या करिव ९ लाख रहेको छ ।

उनीहरु धेरैजसो मेघालयमा नै बस्दछन् । केही भने असम, मणिपुर र पश्चिम बंगालमा पनि छन् । उनीहरु झुम खेती गरेर आफ्नो जीविकोपार्जन गर्दछन् ।

पहिला उनीहरु म्यानमारमा बस्दथे । त्यसपछि उनीहरु शरणार्थीको रुपमा भारत पसे । उनीहरुको भाषा खासी हो । त्यहाँ यिनीहरुबाहेक गारो र जयन्तिया दुई जनजाति पनि रहेका छन् । उनीहरुको पनि यही प्रथा हो । उनीहरुको पनि विवाहपछि बेहुला बेहुलीको घर गएर बस्छ ।