इन्डिया नेपाल पार्टनरशीप समिट २०२२ सम्पन्न

इन्डिया नेपाल पार्टनरशीप समिट २०२२ सम्पन्न भएको छ । गत ७ जुनमा भारतस्थित नेपाली राजदुतावास र पीएचडी चेम्बर अफ कमर्श एण्ड इण्डष्ट्रीद्वारा संयुक्त आयोजनामा उक्त समिट सम्पन्न भएको हो ।

उक्त समारोह भारतले यस बर्ष स्वतन्त्रताको ७५औं बर्ष पुगेको अवसरमा ‘आजादीका अमृत महोत्सव’ मनाउने क्रममा छिमेकी राष्ट्र नेपाल र नेपालीले भारतको स्वतन्त्रतामा पुर्याएको योगदानको स्मरण गरेको थियो ।

उक्त अवसरमा नेपाली राजदूत शंकर प्रसाद शर्मा र डेपुटी चिफ ओफ मिसन राम प्रसाद सुवेदीले नेपाल–भारत सम्बन्धको बारेमा विविध बिषयमा चर्चा गर्दै विशेषगरी नेपालबाट बिजुली निर्यात शुरु भएकोमा खुसी व्यक्त गरे । यसले व्यापार घाटा घटाउने, जनताबिचमा सौहार्दपूर्ण सम्बन्ध लगायतले गर्दा सम्बन्ध झन् बलियो हुँदै गएको र हालसालै प्रधानमन्त्री शेरबहादुर देउवाको भारत भ्रमण र भारतीय प्रधानमन्त्री नरेन्द्र मोदीको लुम्बिनी भ्रमणले नेपाल–भारत सम्बन्धले थप उचाइ लिएकोबारे चर्चा गरे ।

सोही अवसरमा पूर्व भारतीय राजदूत जयन्त प्रसादले नेपाल–भारतका जनता बिचको सुमधुर सम्बन्धको चर्चा गरे । साथै, पूर्व भारतीय प्रधानमन्त्रीले आफ्नो बाल्यकाल उत्तर प्रदेशको बलियामा उनको बुवाले कसरी भारतका गाउँहरुले नेपालबाट बिजुली आएपछि उज्यालो आएको थियो भन्ने कुराको समेत स्मरण गरे ।

यसैगरी, फोटो पत्रकार बिकास रौनियारले आफ्नो प्रस्तुतिका क्रममा नेताद्वय मात्रिकाप्रसाद कोइराला र विश्वेश्वरप्रसाद कोइराला भारतको स्वतन्त्रताका लडाइमा बिहारको हजारी बाघ जेलमा बस्नु परेको प्रसंग उठाए । त्यतिबेला आफ्नो हजुरबुवा शिवप्रसाद रौनियारले भारतको स्वतन्त्रता संग्रामको लडाइँमा उत्तर प्रदेशमा जेल परेका र करिव एक बर्ष लुकेर बस्नु परेको र पछि भारत सरकारले त्यसको कदर स्वतन्त्रता सेनानीको रुपमा पेन्सन र निशुल्क रेल यात्राको सुविधा दिएको स्मरण गरे ।

सोहि अवसरमा नेपाली अनुसन्धानकर्ता आकांक्षा शाह रानाले भारतले नेपालको उत्तर पश्चिम सिमाना मिचेको र इपीजी रिपोर्टलगायत महत्वपुर्ण बिषयमा दुवै देशले खुलेर निष्कर्षमा पुग्नु पर्ने बताइन् ।

कार्यक्रममा पूर्व मेजर जेनेरल अशोक मेहतालगायत अन्य विज्ञहरुले आफ्नो नेपाल र भारत सम्बन्धका विविध आयामबारे आफ्ना धारणा राखेका थिए ।

सिमा जागरण मञ्च, रक्सौलका प्रान्त अध्यक्ष महेशकुमार अग्रवालले नेपाल भारत सीमामा भारुको कठिनाइले व्यापार व्यावसायमा परेको नकारात्मक असरबारे दुवै देशले मिलेर समाधान निकाल्नु पर्नेमा जोड दिए ।

तस्बिरहरु : बिकास रौनियार

यो पनि…
लण्डनमा हुँदैछ नेपाली फिल्म फेस्टिवल
‘सत्यमोहन’ लाई उत्तम शान्ति पुरस्कार (फोटो फिचर)