राइज मिडियाका अध्यक्ष गुरुङ ‘प्रबल जनसेवा श्री चतुर्थ’ बाट सम्मानित

काठमाडौं– राइज मिडिया नेटवर्कका अध्यक्ष तुलसीकुमार गुरुङ प्रबल जनसेवा श्री चतुर्थबाट सम्मानित भएका छन् । प्रवासमा रहेर दशकौंदेखि मातृभूमिको सेवामा समर्पित गुरुङलाई बुधबार राष्ट्रपति विद्यादेवी भण्डारीले प्रबल जनसेवा श्री चतुर्थबाट सम्मान गरेकी हुन् ।

पूर्व ब्रिटिस गोरखा सैनिकसमेत रहेका गुरुङ तेक्वान्दोका प्रशिक्षक र अन्तर्राष्ट्रिय रेफ्रीसमेत हुन् । लामो समयदेखि हङकङमा बस्दै आएका उनी हङकङ तेक्वान्दो राष्ट्रिय टोलीको प्रमुख प्रशिक्षक समेत भइसकेका छन् । साथै, गुरुङ तेक्वान्दोका ८ डान (ग्राण्डमास्टर) हुन् । तेक्वान्दोमा ८ डान अर्थात् ग्राण्डमास्टरको स्थान हासिल गर्ने सम्भवतः उनी नै पहिलो नेपाली हुन् ।

१८ वर्ष सेनामा बिताएका गुरुङ त्यहाँ फिजिकल ट्रेनर अर्थात् वारन्ट अफिसरसम्म भएका थिए । व्रिटिस गोर्खा सैनिकमा पनि यो पद हासिल गर्ने उनी नै पहिलो नेपाली हुन् । उनी अहिले पनि तेक्वान्दोमै सक्रिय छन् । विश्व तेक्वान्दो महासंघको अन्तर्राष्ट्रिय मास्टर प्रशिक्षक र रेफ्रीसमेत रहेका गुरुङले विभिन्न अन्तर्राष्ट्रिय प्रतियोगिताहरूमा रेफ्रीको भूमिका निर्वाह गरिसकेका छन् । उनले हङकङमा सन् २००१ मा ‘हङकङ नेपलिज् तेक्वान्दो एसोसिएसन’ को स्थापना गरेका थिए । उक्त संस्थाबाट हजारौंले ब्ल्याक बेल्ट पाइसकेका छन् ।

सानैदेखि खेलकुदमा रुची भएका गुरुङले २०३८ सालमा काठमाडौंमा आयोजित पहिलो राष्ट्रिय खेलकुद प्रतियोगिताको पौडीतर्फ २ स्वर्ण र १ रजत पदक जितेका थिए । यसैगरी २०४० मा पोखरामा भएको दोस्रो राष्ट्रिय खेलकुद प्रतियोगितामा मार्सल आर्टस्तर्फ स्वर्णपदकसहित उत्कृष्ट फाइटरको उपाधि हासिल गरेका थिए । साथै, उनी सन् १९८२ र १९८३ मा हङकङ ओपन ब्ल्याकबेल्ट कम्पिटिसनको स्वर्ण विजेता समेत हुन् । यसैगरी, सन् १९९३ मा अमेरिकामा आयोजित वर्ल्ड तेक्वान्दो च्याम्पियनशिप र सन् १९९५ मा थाइल्याण्डमा आयोजित इस्ट एशियन गेम्सका आधिकारिक रेफ्रीसमेत हुन् ।

खेलकुदका साथै समाजसेवामा समेत सक्रिय गुरुङले नेपालमा समाजसेवाका थुप्रै काम गरेका छन् । २०७२ को महाभूकम्पपछि स्थापना भएको वि विल राइज फाउन्डेसनका उनी संस्थापक समेत हुन् । नेपाल र नेपालीलाई सहयोग गर्ने उक्त संस्थाको उद्धेश्य हो । उक्त संस्थाले स्थापनाकालदेखि निरन्तर नेपालको शिक्षा, स्वास्थ्य, पर्यटन, खेलकुद लगायतका क्षेत्रमा काम गर्दै आएको छ । दशकौंदेखि समाजसेवामा सक्रिय रहेका गुरुङले भूकम्प होस् या कोभिड–१९ को महामारीका समयमा वि विल राइजमार्फत सामाजिक सेवा गर्दै आएका छन् । यही सेवाभावलाई बुझी नेपाल सरकारले प्रबल जनसेवा श्री चतुर्थबाट गरेको सम्मानले आफूलाई थप हौसला र उर्जा थपेको गुरुङ बताउँछन् ।