ज्ञानेन्द्र मल्लका फ्यान : ठोक्किएर माफी माग्नेदेखि क्रिकेटर बन्न चाहनेसम्म
ज्ञानेन्द्र मल्ल राष्ट्रिय क्रिकेट टोलीका पूर्व कप्तान हुन् । सन् २००६ देखि राष्ट्रिय क्रिकेट टिममा आबद्ध भएका मल्ल सन् २०१९ मा कप्तान भएका थिए ।
क्रिकेट प्रेमीहरूको मनमा छुट्टै छाप बसाउन सफल ज्ञानेन्द्रलाई माया गर्ने फ्यानहरूको सङ्ख्या पनि धेरै छ । आफ्ना धेरै फ्यानमध्ये केही विशेष फ्यानलाई उनी यसरी सम्झन्छन् ।
मजस्तै क्रिकेटर बन्न चाहने फ्यान
एक जना जीवन यादव भन्ने भाइ छन् । जो मेरो एकदमै क्रेजी फ्यानमा पर्छन् । उनले अहिलेसम्म मेरो एउटा पनि म्याच छुटाएका छैनन् । बेलाबेलामा उनले मलाई फोन पनि गरिरहन्छन् ।
दाइ म तपाईंको एकदमै ठूलो फ्यान हो, मलाई तपाईंजस्तै बन्न मन छ पनि भन्छन् । प्राय सधैँ मलाई फोन र म्यासेज गरिरहने मेरो शुभचिन्तक पनि भन्न रुचाउँछु म त्यो भाइलाई ।
एकदमै धेरै म्यासेज गर्ने फ्यान
धेरै जना फ्यानले फेसबुकमा तथा अन्य सामाजिक सञ्जालमा म्यासेज गरिरहनु हुन्छ । तर, एक जना भने अलि अनौठो लाग्छ मलाई । उहाँले मलाई एकै दिनमा धेरै पटक म्यासेज गर्नुहुन्छ । म तपाईंको एकदमै ठूलो फ्यान हुँ । तपाईंको खेल्ने शैली एकदमै मनपर्छ भनेर म्यासेज गर्नुहुन्छ । उहाँले यति धेरै माया गरेको देखेर खुसी लाग्छ ।
ठोक्किएर माफी माग्ने फ्यान
एकपटक म खेलको सिलसिलामा काठमाडौं बाहिर रहँदा त्यहा गेमको अभ्यास सकेर केहीबेर बाहिर घुम्न निस्किएको थिएँ । म हिँड्दै थिए एक जना मानिस अचानक मसँग ठोक्किनु भयो । माफी मागेर अगाडि बढ्नुभयो, म पनि आफ्नो बाटो लाग्दै थिए । एकैछिन पछि दौडँदै मेरो नजिक आएर मलाई हेर्दै भन्नुभयो, ‘क्रिकेटर ज्ञानेन्द्र मल्ल हैन तपाईं, म तपार्ईंको ठूलो फ्यान हुँ नि ।’ मलाई भेटेकोमा उहाँ एकदमै खुसी पनि हुनुभयो।
एकदमै धेरै सहयोग गर्ने फ्यान
म अलि धेरै जनासँग नखुल्ने व्यक्तिमा पर्छु त्यसैले, धेरै जनासँग नजिक पनि छैन । तर एक जना रवि तिमल्सिना भन्ने भाइ हुनुहुन्छ । उहाँ भने मलाई एकदमै माया गर्ने फ्यानमा पर्नुहुन्छ । उहाँले हरेक कुरामा मलाई साथ दिइरहनुभएको हुन्छ । केही सहयोग चाहिएको खण्डमा पनि उहाँ सहयोगको लागि तयार हुनुहुन्छ । त्यसैले, उहाँ पनि अलि विशेष लाग्छ मलाई ।
यो पनि…
‘कलेजमा पहिलो ब्वाई हुनु दबाब थियो’
‘मार्कसिट सच्याउन काठमाडौं आउँदा कलेज भर्ना भएँ’
