काठमाडौंमा स्वास्थ्य तथा जनसंख्या वैज्ञानिकको आठौं शिखर सम्मेलन

स्वास्थ्य तथा जनसंख्या वैज्ञानिकको आठौं शिखर सम्मेलन चैत २७ गतेदेखि काठमाडौंमा हुँदैछ । कोभिडका कारण गएका २ वटा सम्मेलन भर्चुअल भएकोमा यस वर्ष भने भौतिक उपस्थितिमै हुन लागेको हो । 

सम्मेलनको तयारीबारे जानकारी दिन नेपाल स्वास्थ्य अनुसन्धान परिषद्ले आयोजना गरेको पत्रकार भेटघाट कार्यक्रममा परिषद्का सदस्य-सचिव एवं कार्यकारी प्रमुख डा. प्रदीप ज्ञवालीले सम्मेलनको तयारी पूरा भएको जानकारी दिए । ‘स्वास्थ्य नीति तथा प्रणाली अनुसन्धानको प्रवर्द्धन : नेपालमा दृढ स्वास्थ्य प्रणालीका लागि पाठ’ भन्ने नाराका साथ चैत २९ गतेसम्म सञ्चालन हुनेछ । 

डा. ज्ञवालीका अनुसार सम्मेलनमा स्वास्थ्य अनुसन्धानकर्ता, जनस्वास्थ्यविद्, जनसंख्या विद्, नीति निर्माणकर्ता तथा बहुक्षेत्रीय विज्ञहरूबीच छलफल हुनेछ । उक्त छलफबाट तथ्यमा आधारित नीति निर्माण गर्न तथा जनस्वास्थ्यका सवालहरूको अन्तरविषयात्मक अनुसन्धानका निश्कर्ष निकालेर सोही अनुरूप अध्ययन अनुसन्धान गरिने उनले बताए । 

सम्मेलनलाई पारदर्शी बनाउन स्टेरिङ कमिटी, एडभाइजरी कमिटी, साइन्टिफिक कमिटी, अर्गानाइजिङ कमिटी तथा अवार्ड सेलेक्सन सब कमिटी गठन गरिएको छ ।

यी कमिटीहरुको पटक–पटकको परामर्श तथा छलफलद्वारा सम्मेलनको थिम तथा प्रस्तुतीकरणका विषयहरूको छनोट गरिएको कार्यकारी प्रमुख ज्ञवालीले जानकारी दिए ।  तीनदिने सम्मेलनमा स्वास्थ्य प्रणाली तथा नीति, जनस्वास्थ्य, कोभिड –१९ महामारी, क्लिनिकल अनुसन्धान, एक स्वास्थ्य एवम् विश्वव्यापी स्वास्थ्य, बायोमेडिकल र ट्रान्सलेसन अनुसन्धान विषयमा ४० वटा मौखिक प्रस्तुतीकरण हुनेछ । 

अनुसन्धानकर्ताहरूले खोज तथा अनुसन्धानका बारेमा १ सय ५३ वटा अनुसन्धानमूलक कार्यमध्ये ४० वटा प्रस्तुतीकरणका लागि छनोट भएका छन्। 

सम्मेलनमा ३१ जना राष्ट्रिय र २२ जना अन्तर्राष्ट्रिय विज्ञहरूले प्रस्तुतीकरण गर्नेछन् । सम्मेलनको पहिलो दिन पूर्व–सम्मेलन गरिनेछ । जसमा संघीय संरचनामा स्वास्थ्य प्रणालीको सुदुढीकरण र कोभिड १९, यस अन्तर्गत दृढ  प्रादेशिक तथा स्थानीय स्वास्थ्य प्रणाली, रोगहरुको भार, प्रादेशिक तथा स्थानीय स्वास्थ्य सेवा, शासन र नेतृत्वको अवस्था, अवसर र चुनौती तथा कोभिड महामारीका सिकाइहरु, सहकार्य र सञ्जालद्वारा अनुसन्धानको प्रवर्द्धनका साथै अन्य विषयमा आमन्त्रित विज्ञहरूको गहन छलफल र प्रस्तुतीकरण रहनेछ ।
 
सम्मेलनको दोश्रो दिन चैत २८ गते  शिखर सम्मेलनको उद्घाटन स्वास्थ्य तथा जनसंख्या मन्त्री विरोध खतिवडाले गर्ने कार्यक्रम रहेको छ भने दोश्रो सत्रमा दुईवटा समानान्तर सत्रहरुमा स्वास्थ्य प्रणाली र नीति अनुसन्धान, वायोमेडिकल, ईपिडेमियोलोजिकल र क्लिनिकल अनुसन्धान लगायतका विषयहरुमा विज्ञहरुद्वारा प्रस्तुतीकरण साथै बृहत् छलफल गरिनेछ ।  

यसैगरी, सम्मेलनको तेश्रो दिनमा विश्वव्यापी स्वास्थ्य र कार्यान्वयन अनुसन्धानका बारेमा छलफल गरिनेछ । साेही दिन अनुसन्धान आचारसंहिता, औषधि अनुसन्धान, मातृ, नवजात शिशु, र बाल स्वास्थ्य र अन्तरविषय अनुसन्धानका बारेमा स्वदेशी तथा विदेशी विज्ञहरूबाट बृहत् छलफल गरिनेछ । 

मौखिक तथा पोष्टर प्रस्तुतीकरण मध्येबाट एक-एक जनालाई उत्कृष्ट प्रस्तुतीकरण र उत्कृष्ट पोष्टर प्रस्तुतीकरण अवार्ड प्रदान गरिने छ । त्यसैगरी,  बायोमेडिकल जनरलमा विगत ५ वर्षमा सबै भन्दा बढी आर्टिकल प्रकाशित गर्ने एक जना नेपाली अनुसन्धानकर्तालाई उत्कृष्ट कृति पुरस्कार प्रदान गर्ने कार्यक्रम रहेको छ ।

साथै, सम्मेलनमा चिकित्सकहरूलाई उत्कृष्ट स्वास्थ्य अनुसन्धान पुरस्कार, मृगेन्द्र सम्झना मेडिकल ट्रस्ट युवा स्वास्थ्य अनुसन्धानकर्ता पुरस्कार, परिषद्का कर्मचारीलाई मृगेन्द्र सम्झना मेडिकल ट्रस्ट युवा स्वास्थ्य अनुसन्धानकर्ता पुरस्कार र स्वास्थ्य क्षेत्रमा वैज्ञानिक अनुसन्धान वा यसको कार्यान्वयन वा महत्वपूर्ण आविष्कारमा महत्वपूर्ण योगदान पुर्याउनुभएका ६० वर्ष पुगेका नेपाली वैज्ञानिकलाई स्वास्थ्य अनुसन्धान लाईफ टाईम एचिभमेन्ट अवार्डद्वारा सम्मानित गरिनेछ ।

सम्मेलनमा परिषदमा वर्षभरि उत्कृष्ट काम गर्ने एक जना कर्मचारीलाई बेस्ट पर्फमेन्स अवार्डले सम्मानित गरिने कार्यक्रमसमेत रहेकाे छ ।

यो पनि
नेपाल मेडिकल कलेजमा अब कार्डियो, ग्यास्ट्रो र इन्डोक्रोनोलोजीका छुट्टाछुट्टै युनिट
अस्पताल बनेपछि स्थानीय दंग