नेपाल मेडिकल कलेजमा अब कार्डियो, ग्यास्ट्रो र इन्डोक्रोनोलोजीका छुट्टाछुट्टै युनिट
नेपाल मेडिकल कलेज जोरपाटीमा मेडिसिन विभागअन्तर्गत तीन युनिट सञ्चालनमा आएको छ । कलेजले कार्डियोलोजी, ग्यास्ट्रो र इन्डोक्रोनोलोजीका छुट्टाछुट्टै युनिट तयार गरी सञ्चालनमा ल्याएको हो । विगतमा यी तीनै युनिट मेडिसिन विभागअन्तर्गत पर्दथे ।
बिरामीलाई सहज उपचारको व्यवस्थापन गर्न छुट्टाछुट्टै युनिट तयार पारेर उपचार सेवा थालिएको अस्पताल प्रशासनले जनाएको छ । शुक्रबार तीनै युनिटको औपचारिक रूपमा शुरुवात गर्दै कलेजका म्यानेजिङ डाइरेक्टर बसुरुद्धिन अन्सारीले नेपाल मेडिकल कलेजलाई विशेषज्ञ अस्पतालका रूपमा विकास गर्न विभिन्न रोगसँग सम्बन्धित युनिटहरू बनाइएको बताए ।
‘यहाँको स्वास्थ्य सेवालाई समयसापेक्ष सुधार गर्दै विशेषज्ञ सेवाहरू थप गर्न हरेक वार्डहरूमा छुट्टाछुट्टै युनिट बनाउने योजना छ । अहिले कार्डियोलोजी, ग्योस्ट्रोलोजी र इन्डोक्रोनोलोजी युनिट तयार गरिएको हो ।’ अन्सारीले भने ।
उल्लेखित हरेक युनिटमा १२/१२ बेड रहेका छन् । युनिटमा विशेषज्ञ डाक्टर तथा नर्सको व्यवस्थापन गरिएको कलेजका अस्पताल प्रमुख दिलिप साहले बताए । उनका अनुसार यसअघि अस्पतालमा विशेषज्ञ युनिट रहेको थिएन । कार्डियोलोजीलाई व्यवस्थित र बिरामीमैत्री बनाइएको छ ।
युनिटमा इको, इसिजी, हल्टर तथा एबीपी सेवाहरू व्यवस्थापन गरिएको छ । भविष्यमा क्याथल्याब सेवासमेत सूचारू गरेर नेपाल मेडिकल कलेजलाई विशेषज्ञ स्वास्थ्य संस्थाका रूपमा सञ्चालन गर्ने योजना बनाइएको छ ।
कलेजका अस्पताल निर्देशक प्रा.डा. मोदनाथ मरहठ्ठाका अनुसार कार्डियोलोजी विभागमा बंगलादेशबाट एमडी गरेर आएकी डा. सञ्जीता अन्सारी तथा डा. सिर्जना प्रधानाङ्ग लगायत विशेषज्ञ डाक्टरहरुको व्यवस्थापन गरिएको छ ।
यसैगरी, ग्यास्ट्रोलोजीमा डा. सुनील मरिक, डा. अवशेष भण्डारी लगायतको टिम रहेको छ । इन्डोक्रोनोलोजीमा डा. प्रवीण अधिकारी लगायतको टिम रहेको अस्पताल निर्देशक मरहठ्ठाले जानकारी दिए । डा. मरहठ्ठा त्रिवि शिक्षण अस्पतालमा प्राध्यापक डाक्टर हुन् ।
सय बेडको डायलाइसिस सेवा सञ्चालनमा आउँदै
नेपाल मेडिकल कलेजलाई मिर्गौला रोगीको लागि एक सय बेडको डायलाइसिस सेवा चाँडै सञ्चालनमा आउने भएको छ । कलेजका म्यानेजिङ डाइरेक्टर अन्सारीका अनुसार अहिले भइरहेको ५० बेडको डायलाइसिस सेवालाई स्तरोन्नति गर्दै थप ५० बेड बनाइँदै छ ।
एक सय बेड तयार भएपछि दैनिक तीन सयको डायलाइसिस गर्न सकिनेछ । ‘अहिले राजधानीमा मात्र हैन देशैभरि मिर्गौला रोगीहरूको उपचारमा डायलाइसिस सेवा नगन्य छ । हामीले दैनिक तीन सय मिर्गौला रोगीको डायलाइसिस गर्नेगरी पूर्वाधार बनाउँदै छौँ ।’ अन्सारीले भने ।
नेपाल मेडिकल कलेजमा नेसनल मेडिकल कलेज विरगञ्जका सञ्चालक अन्सारीको प्रवेश सँगै स्वास्थ्य सेवामा सुधार गरिएको छ । कुनै बेला इमरजेन्सीमा आउने सामान्य बिरामीलाई समेत राजधानीका अन्य अस्पतालहरूमा रेफर गर्ने अवस्थामा पुगेको थियो । अहिले विशेषज्ञ तथा दक्ष चिकित्सकीय जनशक्ति थप गरिएकोले अन्य अस्पतालबाट बिरामीहरू रेफर भएर आउन थालेका छन् ।
यो पनि
आर्थिक संकटको असर : अस्पतालले रोक्यो शल्यक्रिया सेवा
अस्पताल बनेपछि स्थानीय दंग
