डेलिभरीपछि यसरी घटाउनुहोस् आफ्नो तौल

गर्भावस्थाको समयमा, धेरै महिलाहरूको वजन बढ्छ । यो एक प्राकृतिक प्रक्रिया हो । तर कतिपय महिलाको भने गर्भावस्थापछि पनि छिट्टै तौल घट्दैन । यस्तो अवस्थामा उनीहरू बढेको तौललाई लिएर चिन्तित हुन थाल्छन् र शरीरको आकार पहिलेको जस्तै बनाउन धेरै उपाय अपनाउँछन् ।

कतिपय महिलाले खान र पिउन पनि छोड्छन् । तर यदि तपाईं आफ्नो बच्चालाई स्तनपान गराउँदै हुनुहुन्छ भने खाना त्याग्नु आमा बच्चा दुवैको लागि स्वस्थ विकल्प नहुन सक्छ ।

खाना छाड्नु तौल घटाउने स्वास्थ्य तरिका होइन । यसका कारण तपाईंसँगै बच्चालाई पनि पर्याप्त मात्रामा पोषक तत्त्व प्राप्त हुँदैन । कमजोरी महसुस हुन सक्छ । यस्तो अवस्थामा डेलिभरीपछि तौल घटाउने यी उपायहरू स्वस्थ तरिकाले अपनाउनुपर्छ ।

पोषणमा ध्यान दिने
गुणस्तरीय पोषणमा ध्यान दिनुपर्छ । घरमा पकाएको ताजा खाना खानुहोस् । सम्पूर्ण अन्न, राम्रो गुणस्तरको प्रोटिन, फ्याट, हरियो तरकारी तथा फलफूल र विभिन्न रङका खानेकुरालाई आहारको हिस्सा बनाउनुहोस् । दैनिक ८ देखि १० ग्लास पानी पिउनु पर्छ यसले स्तनपान सहज हुन्छ र डिहाइड्रेसन हुँदैन । यसबाहेक समयमै सप्लिमेन्ट लिनुहोस् र व्यायाम गर्न नबिर्सनुहोस् ।

पोषणविद्को सल्लाहबिना डाइड प्लान नगर्ने
गर्भावस्थापछिको तौल घटाउनका लागि कुनै पनि प्रकारको डाइटको पालना नगर्नुहोस् । गर्भावस्था पछि, पोषक तत्त्वहरू सेवन गरेर आफ्नो शरीरलाई बलियो बनाउनुपर्छ । त्यसैले पोषण विशेषज्ञबाट सही सल्लाह लिनुहोस्, जसले तपाईंलाई आवश्यक पोषक तत्त्वहरू कसरी समावेश गर्ने भन्नेबारे सही दिशानिर्देशहरू दिन सक्छन् ।

जङ्क फुड सेवन कम गर्ने
गर्भावस्थाको सम्पूर्ण नौ महिना कठिन हुन्छ, त्यसपछि जब तपाईं आफ्नो बच्चालाई आफ्नो दूध खुवाउनुहुन्छ, तब त्यो समयमा खानामा पनि विशेष ध्यान दिनुपर्छ । प्याकेज गरिएको खाना, जङ्क फुड आदिको उपभोग नगर्नुहोस् । तौल घटाउनका लागि मखना, स्टिम र पफ गरिएको चामल, ताजा फलफूल जस्ता केही स्वस्थ खाना खानुहोस् । खाना खाएपछि बच्चालाई भोक लाग्दा यसको सेवन गर्नुहोस् । यसले स्वस्थ रहनुका साथै तौल बढ्न दिँदैन ।

खानामा फ्याटी एसिड र भिटामिन ‘सी’ समावेश गर्ने
खानामा फ्याटी एसिड समावेश गर्नुहोस् । घ्यु, मख्खन, एभोकाडो र ड्राईफ्रुटहरूको पनि सेवनबाट पनि राम्रो फ्याट प्राप्त गर्न सकिन्छ । यसबाट शरीरलाई ऊर्जा मिल्छ, मेटाबोलिज्म तेज हुन्छ, शरीरलाई पूर्ण पोषण मिल्छ, छाला र कपालको स्वास्थ्य पनि राम्रो रहन्छ । त्यसको साथै भिटामिन ‘सी’ पाइने फलफूलहरू पनि दैनिक सेवन गर्नुपर्छ । यसमा धेरै फाइबर हुने भएकोले तौल घटाउन सहयोग गर्छ ।

स्तनपानले पनि तौल घटाउँछ
डेलिभरीपछि बच्चालाई स्तनपान गराउँदा पनि आमाको तौल नियन्त्रण भइरहेको हुन्छ । आमाहरूले ६ महिनासम्म स्तनपान गराउँदा क्यालोरी बर्न हुन्छ र तौल नियन्त्रण गर्न पनि प्रभावकारी हुन्छ । स्तनपान गराउने महिलाले अन्य समयभन्दा ५०० ग्राम क्यालोरी बढी सेवन गर्नुपर्छ र ब्यालेन्स डाइट पनि गर्नुपर्छ ।

यो पनि….
गर्भावस्थाको समयमा वाकवाकीबाट राहत पाउने उपाय
गर्भावस्थामा होली खेल्दा यी कुरामा ध्यान दिनुहोस्
गर्भावस्थामा सेक्स गर्दा यी कुरामा ध्यान दिऔं