‘किताबमा भएको राजाको फोटो च्यात्दा जेल परेँ’
‘युनियन विवादको निशानामा म पर्थें’
काठमाडौंस्थित सिद्धार्थ वनस्थली स्कुलबाट २०४७ मा एसएलसी (एसईई) दिएँ । नतिजा राम्रो आएको थियो । २०४६ को आन्दोलनमा सहभागी भएकाले स्कुलबाट रेस्ट्रिकेट भएको थिए । तर, त्यो फुकुवा भयो । र परीक्षा दिएँ । एसएलसीको नतिजा राम्रो हुनेको विज्ञान पढ्ने क्रेज थियो । विज्ञान विषय पढ्न पाइने र राजनीति पनि गर्न पाइने अमृत साइन्स कलेज (अस्कल) मा आईएस्सी (प्लस टु) भर्ना भएँ । पहिलो वर्ष (कक्षा ११) पढाइमै केन्द्रित भएँ । तर, टाइफाइड भएकाले नियमित परीक्षा दिन सकिनँ र विद्यार्थी राजनीतिमा लागेँ । स्नातक तहमा बिएस्सी पनि भर्ना भएँ, तर अखिल र नेविसंघको झगडा हुँदा, मलाई नै लक्षित गर्थे । बिएस्सीलाई पनि धेरै निरन्तरता दिन सकिनँ ।
पढाइलाई निरन्तरता दिनुपर्छ भन्ने मनसायले त्रिचन्द्र क्याम्पसमा स्नातक तहमा मानविकी संकायबाट समाजशास्त्रमा भर्ना भएँ । कलेज नियमित गइनँ, तर नगए पनि औपचारिक अध्ययनलाईचाहिँ निरन्तरता दिइरहेँँ । विद्याथीहरूसँग सम्बन्ध बनाउनका लागि कलेजबाट आयोजित वनभोज, वार्षिक कार्यमा सहभागी हुन्थेँ ।
कलेजमा नियमित विद्यार्थी भएन । अध्ययन गर्ने खास विद्यार्थी पनि भएन । कलेज लाइफ राजनीतिमै होमिएर बित्यो । पाठ्यपुस्तकमा भएको राजाको फोटो च्यातेर जेल पनि बसियो ।
पढाइभन्दा सामाजिक र राजनीतिक क्रियाकलाप गरिएमा नेपाली राजनीति गर्न सकिने प्रवृत्ति छ । विद्यार्थी राजनीतिमा पनि सोही लागू थियो । पढाइभन्दा भाषण गर्ने, राजनीतिका विभिन्न कार्य गरिन्थ्यो । पढाइभन्दा तीनै कार्यमा व्यस्तता भइन्थ्यो ।
परीक्षाभन्दा केही दिन अगाडि स्वाध्ययन गरेर परीक्षा दिइन्थ्यो । तर, परीक्षा फारम भर्दा कहिले हाजिर नपुगेर त कहिले प्रयोगात्मक परीक्षा नदिएकाले समस्या पथ्र्यो । होस्टेलमा बसेर कलेज पढेँ । त्यहाँ पनि कतिपय समस्याहरू हुन्थे । आफू नै विद्यार्थीको लिडर भएपछि समाधान गर्नु मेरो दायित्व थियो ।
कसैले केटी जिस्काए वा कुनै विद्यार्थीको समस्या परेमा मेरो समाधान गर्ने ठूलो भूुमिका हुन्थ्यो । कलेज पढ्दा साथीहरूको मायाप्रेम पथ्र्यो घुम्न जान्थे । रमाइलो गर्थे, तर, मेरो त्यतापट्टि परेन । राजनीति पहिलो प्राथमिकता थियो । अर्को कुरा कलेजमा छवि बिर्गानु थिएन ।
कलेज पढ्दै होम ट्युसनलगायत छोटो समयका केही काम गरेँ । विद्यार्थी राजनीतिमा लगाव थियो । काम गर्दा राजनीतिमा केन्द्रित हुन सकिँदैन कि भन्ने डर थियो ।
कलेजबाटै भारतसम्म पहिलोपटक भ्रमण गरेको थिएँ । कलेजबाट २०४९ सालमा चुनाव लडेँ । २०५० सालमा नेविसंघको अध्यक्ष भएँ । यहीबाट २०५३ मा स्वतन्त्र विद्यार्थी युनियनको निर्वाचन जितेको थिएँ । यसरी नै राजनीतिमा सक्रिय भएँ । २०५८ मा त्रिचन्द्रबाटै समाजशास्त्रमा स्नातकोत्तर सकेँ ।
यो पनि…
र्यापर बालेन शाह भन्छन्,–‘ इन्जिनियरिङमा युर्निभसिटी टप गरेँ’
‘जोसँग लभ पर्यो उनै बनिन् जीवनसंगीनी’
