टी-२० अन्तर्राष्ट्रिय सिरिजमा नेपालको विजयी शुरूवात
नेपाल, पपुवा न्युगिनी (पीएनजी) र मलेसियाबीच त्रिकोणात्मक टी-२० अन्तर्राष्ट्रिय सिरिजमा नेपालको विजय भएको छ। सोमबार कीर्तिपुरस्थित त्रिवि अन्तर्राष्ट्रिय मैदानमा नेपालले पीएनजीलाई १५ रनले पराजित गरेको हो।
नेपालले दिएको १८४ रनको लक्ष्य पछ्याएको पिएनजी चार बल खेल्न बाँकी छँदा १६८ रनमा अलआउट भयो।
अन्तिम ओभरमा पिएनजीलाई १७ रन चाहिएको थियो भने उसको एक विकेट बाँकी थियो। जसमा नेपालले दोस्रो बलमा रनआउटमार्फत पिएनजीको अन्तिम विकेट लियो।
पीएनजीका लागि नोर्मान भानुआले अर्धशतक प्रहार गरे । ५२ रन बनाएर खेलिरहँदा उनी १९औं ओभरको पाँचौं बलमा करण केसीले एलबिडब्लूको धरापमा पारेका थिए। छैटौं बलमा सिमोन अताइ शून्यमा आउट भएपछि नेपाल सहज स्थितिमा पुगेको थियो।
चार्ल्स अमिनीलाई अबिनास बोहराले २२ रनमा बोल्ड गरे। सेसे बाउ पनि ३० रन बनाएर खेलिरहदा नेपालका कप्तान सन्दीप लामिछानेको एलबिडब्लूको धरापमा परे। रिले हेकुरे ३ रन र जासन किला शून्यमा आउट भए।
बलिङमा नेपालका करण केसीले ३ विकेट लिए। उनले ४ ओभरमा ४४ दिएका थिए। कप्तान सन्दीप लामिछानेले पनि ३ विकेट हात पारे। उनले ४ ओभरमा २२ रन खर्चिए। अबिनास बोहराले २ विकेट लिए उनले ४ ओभरमा २९ रन दिए। सोमपाल कामीले १ विकेट लिए।
त्यसअघि पिएनजीले टस जितेर बलिङ रोजेपछि पहिले ब्याटिङको निम्तो पाएको नेपालले ९ विकेटको क्षतिमा १८३ रन जोड्यो।
नेपालका लागि ओपनिङ ब्याट्सम्यान आसिफ शेखले ४३ रन जोडे। उनले ३५ बलमा ५ चौका र १ छक्का प्रहार गरे। त्यसअघि ओपनर कुशल भुर्तेल २० रनमा रनआउटको सिकार बनेका थिए। उनले ११ बलमा ३ चौका र १ छक्का प्रहार गरे।
रोहितकुमार पौडेलले २६ बलमा ३४ रन जोडे। उनले २ चौका र १ छक्का प्रहार गरे। दीपेन्द्रसिंह ऐरी ४ रन, कुशल मल्ल ११ रन र लोकेश बम ५ रन मा आउट भए।
अन्तिम ओभरमा आरिफ शेख २२ बलमा ३१ रन जोडेर आउट भए। बलिङमा पिएनजीका अलेइ नाओ, चाड सोपर र चार्ल्स अमिनीले २-२ विकेट लिए। सिरिजमा भोलि मलेसिया र पपुव न्युगिनीबीच खेल हुनेछ।
यो पनि
नेपालले दियो १८४ रनको लक्ष
पिएनजीविरूद्ध दीपेन्द्रको अर्धशतक
