पूजा शर्माका फ्यान : ट्याटु बनाउनेदेखि रुँदै हग गर्नेसम्म

युवा पुस्तामा निकै लोकप्रिय नायिका हुन् पूजा शर्मा । नायिका पूजाले ‘थ्री लभर’ बाट चलचित्र क्षेत्रमा डेब्यु गरेकी हुन् । उनले ‘प्रेम गीत’, ‘म यस्तो गीत गाउँछु, ‘रामकहानी’, ‘पोइ पर्यो काले’ लगायतका फिल्ममा अभिनय गरिसकेकी छिन् । ‘प्रेम गीत’ उनको सबैभन्दा सफल चलचित्र हो ।

पछिल्लो समय उनको निर्माण तथा अभिनय रहेको चलचित्र ‘म यस्तो गीत गाउँछु २’ प्रदर्शनमा छ । पूजाको फ्यान फलोइङ एकदमै राम्रो छ । फेसबुक पेजमा मात्र उनलाई फलो गर्नेको सङ्ख्या तीन लाखभन्दा माथि छ । आफ्ना केही अनौठा फ्यानलाई उनी यसरी सम्झिन्छिन् :

मेरो नामको ट्याटु बनाउने फ्यान

मेरो धेरै अनौठा फ्यानहरू छन् । त्यसैले, पनि याद गर्न गाह्रो छ । एक जना फ्यान भने मलाई सधैँ याद हुन्छ । किनकि, उहाँले हातमा मेरो नामको ट्याटु नै बनाउनुभएको छ । धेरै फ्यानहरूले फेसबुक तथा इस्ट्रागाममा म्यासेज गरिरहनुहुन्छ । त्यसैले, सबैको म्यासेज हेरेर तथा रिप्लाई गर्न सम्भव पनि हुँदैन । एकजना पुरुष फ्यानले भने मलाई दैनिक धेरैपटक म्यासेज गरिरहनुहुन्थ्यो । एक पटक मैले उहाँको म्यासेज हेरेँ । ‘म तपाईंको एकदमै ठूलो फ्यान हुँ, त्यसैले मैले तपाईंको नामको ट्याटु नै बनाएको छु’ ती फ्यानले ट्याटुको फोटोसहित म्यासेज पठाउनुभएको थियो ।

मेरो विषयमा हरेक कुरा थाहा हुने फ्यान

एक जना फ्यान पनि मलाई अनौठो लाग्छ । उहाँलाई मेरो विषयमा हरेक कुरा थाहा हुन्छ । उहाँलाई मेरोबारे सबै कुरा कसरी थाहा हुन्छ भनेर म आफैँ अचम्ममा परेको छु ।
ती फ्यानसँग मेरो एकपटक भेट पनि भएको थियो । भेटका क्रममा उहाँले मलाई एउटा डायरी दिनुभएको थियो । मेरो विषयमा हरेक जानकारी त्यो डायरीमा थियो । मेरो कुनै नयाँ फिल्म तथा म्युजिक भिडियो रिलिज हुनेबित्तिकै हेरेर प्रतिक्रिया पनि दिनुहुन्छ ।

हात समात्न आउने फ्यान

‘म यस्तो गीत गाउँछु २’ हलहरूमा प्रदर्शन भइरहेको छ । आफ्ना फ्यानहरूलाई भेट्नको लागि म हलहरूमा पुगेको थिएँ । धेरै फ्यानहरू मसँग फोटो खिच्न र मसँग कुरा गर्नको लागि एकदमै उत्साहित थिएँ । त्यही भिडमा एक जना महिला फ्यान अगाडि आएर रुँदै भन्न थाल्नुभयो, ‘दिदी प्लिज एकपटक तपाईंको हात समात्छु नि । तपाईं मेरो अगाडि हुनुहुन्छ भनेर मलाई विश्वास नै लागेको छैन ।’ उहाँ पनि मलाई अनौठो लाग्यो ।

रुँदै हग गर्ने फ्यान

मलाई भेट्दा रुने फ्यानहरू पनि धेरै हुनुहुन्छ । तर, केही दिनअघि ‘म यस्तो गीत गाउँछु २’ कै दर्शकहरू भेट्ने क्रममा एक जना फ्यानले भने मलाई अचम्ममा पार्नुभयो ।

दर्शकहरूलाई भेट्नको लागि हलमा पुग्दा धेरै भिड थियो । एक जना महिला भिडलाई छिचोल्दै र ठेल्दै मेरो नजिक आएर कस्सिएर हग गर्दै मज्जाले रुनुभयो । उहालाई पनि म सम्झिरहन्छु ।

यो पनि…
भरतमणिका फ्यान : मुटु दिन्छु भन्नेदेखि उपहार दिनेसम्म
सीता न्यौपानेका फ्यान : बाइकमा फलो गर्नेदेखि प्रेम प्रस्ताव राख्नेसम्म (भिडियो पनि)