जिम्मेवारी र दायित्व बोधसहितको पत्रकारिता, हाम्रो प्राथमिकता
आजबाट हामी पहिलो वर्ष पूरा गरी दोस्रो वर्षमा प्रवेश गरेका छौँ । राइज मिडिया नेटवर्क र यसले गत वर्ष महाशिवरात्रिकै दिनदेखि सञ्चालनमा ल्याएको डिजिटल पत्रिका मेरोलाइफस्टाइलले आजदेखि पहिलो खुड्किलो पार गरेको छ ।
राजनीतिलाई केन्द्रमा राख्ने नेपाली पत्रकारिताभन्दा अलिक फरक शैलीमा प्रस्तुत हुने चाहनासहित हामीले आजकै दिन डिजिटल प्लेटफर्ममार्फत पत्रकारिता प्रारम्भ गरेका थियौँ । जीवनशैलीमा दैनिक प्रभाव पार्ने र आम नेपालीको चासो रहेका मुद्दाहरूमा केन्द्रित रहेर हामीले पत्रकारिताको अभ्यास गर्दै आयौँ, यो एक वर्षमा ।
पत्रकारितामा एक वर्षको यात्रा लामो होइन । आजको नेपाल पनि एकै दिन बनेको होइन । कठोर संघर्ष, दूरगामी सोच र निरन्तर परिश्रमले नै हाम्रो देश आजको स्थितिमा आइपुगेको हो ।
यति छोटो समयका बीचमा पनि हामीले पाठकको रुचि र चासोका सम्बन्धमा केही सिक्ने मौका पायौँ । पक्कै पनि काम गर्दै सिक्दै जाने क्रममा केही कमी कमजोरी भएको हुनसक्छ । तर, त्यसैलाई साक्षात्कार गर्दै हामी आजको दिनसम्म आइपुगेका हौँ ।
पाठकका रुचि र चासोमा विविधता छ । हाम्रा लागि यो निकै चुनौतीपूर्ण पनि छ । तर, हामी आजका दिन प्रण गर्न चाहन्छौँ, सबै चुनौतीलाई कुशलतापूर्वक छिचोल्दै हामी अगाडि बढ्नेछौँ ।
पत्रकारिताको आवरणमा देखिँदै आएको गैरजिम्मेवार प्रवृत्ति, गलत नियतका साथ हुने चलखेल तथा पत्रकारिताको धर्म र मर्मविपरीत अभ्यासमा हामीलाई विश्वास छैन । हामीले गर्ने पत्रकारिता भयरहित पत्रकारिता हो । हामीले गर्ने पत्रकारिता समाज र राष्ट्रप्रतिको जिम्मेवारी सहितको पत्रकारिता हो । यसमा हामीले कहीँ कतै सम्झौता गर्दैनौँ, गरेका छैनौँ । चुकेका छैनौँ, चुक्दैनौँ ।
अबको मूलधार पत्रकारिता जेलिएको राजनीतिमा मात्र केन्द्रित हुने होइन, विकास र सम्भावनाको खोजीमा पनि आफूलाई समर्पित गर्नुपर्छ भन्ने हाम्रो मूल मर्म हो । आम जनताको जीवनशैली सुधारको वकालत गर्दै गर्दा यससँग सम्बन्धित अधिकारका आधारभूत पक्ष तथा अवरोधका विरुद्ध खबरदारी गर्ने पत्रकारिताको आधारभूत मान्यताबाट समेत हामी किञ्चित विचलित हुने छैनौँ ।
हाम्रो यही विश्वासलाई मूर्तरूप दिन पाठक, दर्शकका साथै आलोचक, समीक्षक र शुभेच्छुकहरूले उपयुक्त भूमिका निर्वाह गरिदिनुभयो भने हामी गन्तव्यमा पुग्न सक्नेछौँ । यहाँहरूबाट प्राप्त हुने सल्लाह, सुझाव हाम्रा लागि अमूल्य मार्गनिर्देशन हुनेछ ।
दोस्रो वर्षको यात्रामा लाग्दै गर्दा राइज मिडिया नेटवर्कको डिजिटल पत्रिका मेरोलाइफस्टाइल डटकमलाई थप परिस्कृत र परिमार्जन गर्दै जानेछौँ । हामीलाई हेक्का छ, आम जनताको रुचि, चाहना र चासो नै हाम्रा लागि प्राथमिकताको केन्द्रमा हुनेछ ।
यसै वर्षदेखि हामीले प्रत्येक महाशिवरात्रिको पावन दिनलाई हाम्रो जन्मदिनका रूपमा लिनेछौँ । जसरी, महाशिवरात्रिले अन्धकारबाट उज्यालोतिरको बाटोको संकेत गर्छ, त्यसरी नै हाम्रा आगामी कदम पनि मानिसको जीवनशैलीमा गुणस्तरीय सुधारमा केन्द्रित हुने अपेक्षा गरेका छौँ ।
अन्त्यमा, हाम्रा सम्पूर्ण सहकर्मी, पाठकवर्ग तथा सबै सहयोगी तथा शुभेच्छुकहरूलाई पहिलो वार्षिकोत्सवको अवसरमा शुभकामना व्यक्त गर्दछु ।
धन्यवाद ।
![](https://www.merolifestyle.com/wp-content/uploads/2022/03/Tulsi-K-Gurung-768x677.jpg)