सत्यवतीलाई लिटल फ्लावरको उपाधि

सत्यवती एकेडेमी अत्तरियाले छैठौं संस्करणको धनगढी मेयर लिटल फ्लावर प्रिमियर लिग अन्डर-१९ स्कुल स्तरीय क्रिकेट प्रतियोगिता उपाधि जितेको छ । विद्याभूषण पब्लिक स्कुल गेटा कैलालीलाई १६१ रनले हराउँदै पहिलोपटक सत्यवतिले उपाधि जितेको हो ।

उपाधिसहित सत्यवती एकेडेमीले १ लाख ५० हजार रुपैयाँ तथा उपविजेता बिद्याभुषणले ७५ हजार रुपैयाँ प्राप्त गर्यो । धनगढी स्थित प्रदेश प्रहरी कार्यालयको खेल मैदानमा सम्पन्न फाइनलमा २ रय ५१ रनको विशाल विजयी लक्ष्य पछ्याएको विद्याभूषणले १२.१ ओभरमा ८९ रनमा अल आउट भयो ।

विद्याभूषणका नुरेन विष्टले सर्वाधिक ३१ रन बनाए । प्रशान्त थापाले १३ रन बनाउनुबाहेक अन्य ब्याटरले दोहोरो अंकमा रन बनाउन सकेनन्। युवराज खत्री र निरज भट्टले ३-३ विकेट लिए । सन्तोष कार्की र सुजन गौतमले २-२ विकेट लिए । त्यसअघि टस जितेर ब्याटिङ गरेको सत्यवती एकेडेमीले २० ओभरमा ४ विकेट क्षतिमा २ सय ५० रन बनाएको थियो।

सत्यवतीका ओपनर सन्तोष कार्कीले सर्वाधिक ४५ बलमा ३ चौका र ११ छक्कासहित सर्वाधिक ९८ रन बनाए। खगेन्द्र जोशीले ५१ बलमा १० चौका र ३ छक्का सहित ८३ रन बनाए । आदील अन्सारीले १२ बलमा २ चौका र ३ छक्का सहित ३५ र सुजन गौतमले ५ बलमा ३ छक्का मद्दतले १९ रन योगदान दिए ।

ओपनर सन्तोष कार्की र खगेन्द्र जोशीले पहिलो विकेटका लागि १ सय ८० रनको साझेदारी गरेका थिए । विद्या भूषणका बलर प्रदीप चन्दले ३ विकेट र वीरेन्द्र नाथले एक विकेट लिए। कप्तान शेरले ४ ओभर बलिंग गर्दा ७९ रन खर्चेर विकेटविहिन रहे।

प्रतियोगिताकै उत्कृस्ट खेलाडी सत्यवती एकेडेमीका सन्तोष कार्की चुनिए । उनले २० हजार रुपैयाँ प्राप्त गरे। यस्तै, उत्कृष्ट ब्याट्सम्यान विद्या भूषणका वीरेन्द्र नाथ र बलर हिमालयन व्हाइट हाउसका दिपक बोहरा चुनिए । जनही १० हजार रुपैयाँ प्राप्त गरे । उदयमान खेलाडी सत्यवती एकेडेमीका युवराज खत्री चुनिए जसले १० हजार रुपैयाँ प्राप्त गरे ।

यो पनि
रन फर फनमा जे देखियो (फोटो फिचर)
महिला टी–ट्वान्टी च्याम्पियनसिपमा एपीएफ विजयी