‘बल्छी ध्रुवेका’ फ्यान : सिरियल हेरेर नेपाली बोल्नेदेखि फोटो राखेर केक काट्नेसम्म
टेलिचलचित्र ‘मेरी बास्सै’ बाट अभिनय यात्रा शुरु गरेका मरिचमान श्रेष्ठ ‘बल्छी ध्रुवे’ पछिल्लो समय टेलिचलचित्र ‘जुठे’ र ‘हल्का रमाइलो’मा व्यस्त छन् ।
मेरी बास्सै टेलिचलचित्रमा माझीको भूमिकामा देखिएसँगै उनलाई धेरैले बल्छी ध्रुवेको नामले नै चिन्न थाले ।
उनले अभिनय गरेका दुई टेलिचलचित्र ‘जुठे’ र ‘हल्का रमाइलो’लाई युट्युबमार्फत धेरै दर्शकले मन पराएका छन् ।
उनको युट्युब च्यानल बल्छी ध्रुवेमा १० लाख भन्दा बढी सब्स्क्राइबर छन् । धेरै फ्यानहरूमध्ये यी अनौठा फ्यानलाई उनी यसरी सम्झन्छन् ।
फोटो अगाडि राखेर केक काट्ने फ्यान
कलाकार सरिता लामिछानेले एकपटक मलाई फोन गर्नुभयो । ‘मरिच भाई युकेमा मेरो एउटा भाइ छ उसको छोरी तिम्रो फ्यान हो ऊसँग एकपटक कुरा गरिदेऊ है आज उसको जन्मदिन हो’ भन्नुभयो ।
मैले ‘हस् दिदी’ भनेर सरिता दिदीको भाइलाई भिडियो कल गरेँ उनको छोरी मेरो फोटो अगाडि राखेर केक काट्दै थिइन् । त्यो देखेर म भावुक भएँ । ती सानी फ्यानलाई पनि म कहिल्यै बिर्सन्नँ ।
निःशुल्क कपाल हाइलाइट गर्दिने फ्यान
करिब दुई वर्षअघि राजु पौडेल र म एउटा कार्यक्रमको लागि अस्ट्रेलिया गएका थियौ । त्यहाँ करिब २१ दिन जति हामी सिड्नीमा बसेका थियौँ । त्यहाँ भएका नेपालीहरूले हामीलाई असाध्यै माया गर्नुहुन्थ्यो ।
हरेक दिनजसो खाना खानका लागि निमन्त्रणा दिनुहुन्थ्यो । त्यसै क्रममा एक दिन एक जना फ्यान हामीलाई बोलाउन २२ घण्टा लगाएर सिड्नी आएका थिए ।
उनले हामीलाई आफ्नो घर तथा पसलमा लगे । उनको पार्लर कस्मेटिक पसल रहेछ । त्यहाँ लगेर ती फ्यानले मेरो कपाल निःशुल्क हाइलाइट गरिदिएका थिए ।
सिरियल हेरेर नेपाली बोल्न सिक्ने फ्यान
अमेरिकामा एक जना नेपाली फ्यान हुनुहुन्छ । उहाँको घर पोखरा रहेछ । नेपाल आएको बेला उहाँ मलाई भेट्नका लागि काठमाडौं आएका थिए । उनका दुई छोराहरू पनि मेरो फ्यान रहेछन् ।
उनका ती दुई छोराहरूले मेरो सिरियल हेरेर नै नेपाली बोल्न सिकेको भनेर मलाई ती फ्यानले सुनाए । त्यो कुरा सुनेर सारै खुसी लाग्यो । देश बाहिर भएर पनि नेपाली कलाकारहरूलाई माया गर्नेको सङ्ख्या धेरै रहेछ । त्यसैले, ती फ्यानलाई पनि म सम्झिरहन्छु ।
फोटो खिच्नकै लागि धेरैपटक फुटसल आउने फ्यान
खरीबोट वनस्थलीमा ‘बल्छी ध्रुवे फुटसल’ छ । धेरै जना फ्यान मलाई भेट्नको लागि त्यहाँ आउनुहुन्छ ।
एक जनाले मलाई बारम्बार फोन गरेर तपाईंको फुटसलमा आएको छु भनिरहनुहुन्थ्यो । ती व्यक्ति धेरैपटक मसँग फोटो खिच्नको लागि फुटसलमा आएका रहेछन् । तर, मसँग भेट भने भएको थिएन ।
एकपटक फुटसलमा मेरो उहाँसँग भेट भयो मलाई भेटेर फोटो खिच्न पाउँदा उहाँ एकदमै धेरै खुसी भएको पनि सम्झना छ ।
यो पनि…
किरण केसीका ४ अनौठा फ्यान
दीपक लिम्बुका फ्यान: रुनेदेखि हाँस्न लगाउने सम्म
