बप्पी लाहिरी : गिनिज बुकमा नामदेखि माइकल ज्याक्सनसमेत फ्यान
८० र ९० को दशकमा भारतमा डिस्को संगीतलाई लोकप्रिय बनाएका संगीतकार तथा गायक बप्पी लाहिरीको ६९ वर्षको उमेरमा मंगलबार निधन भएको छ ।
एक महिनादेखि अस्पतालमा भर्ना भएका बप्पीलाई सोमबार मात्र डिस्चार्ज गरिएको थियो । तर, मंगलबार उनको स्वास्थ्य अवस्था बिग्रिएपछि बप्पीको परिवारले डाक्टरलाई घरमा बोलाएका थिए ।
यद्यपि, स्वास्थ्य अवस्था जटिल बन्दै गएपछि उनलाई पुनः अस्पतालका लगिए पनि उनलाई बचाउन डाक्टर असफल भए ।
बप्पी भारतमा डिस्को किंगका रूपमा परिचित थिए । आमा बन्सरी लाहिरी र बुबा अपरेश लाहिरीको कोखबाट सन् १९५२ मा कलकत्ताको पश्चिमी बंगालमा जन्मिएका उनले १९ वर्षको उमेरमा संगीत निर्देशनको रूपमा आफ्नो करियरको शुरुवात गरेका थिए । उनका बुबा आमा पनि संगीतकार एवं गायक–गायिका थिए ।
बप्पीले पहिलोपटक बंगाली फिल्म ‘दादु’ (१९७२)मा गीत गाउने मौका पाए । उनले हिन्दी फिल्ममा आफ्नो ठाउँ ‘नन्हा शिकारी’ (१९७२) बाट बनाए । यस्तै, ताहिर हुसेनको हिन्दी फिल्म, ‘जख्मी’ (१९७५)बाट बलिउडमा आफूलाई स्थापित गरी गायकको रूपमा पहिचान बनाउन सफल भएका थिए ।
१९७०–८०को दशकमा समयमा एकदमै लोकप्रिय उनले भारतीय सिनेमामा संश्लेषित डिस्को संगीतलाई अझ राम्रोसँग एकीकृत गर्न मद्दत गरेका थिए ।
बप्पीले भर्खरै आयुष्मान खुराना र जितेन्द्र कुमार स्टारर फिल्म ‘शुभ मंगल जब सावधान’ का लागि ‘अरे प्यार कर ले’ शीर्षकको आफ्नो गित ‘यार बिना चैन कहाँ रे’ को रिमिक्स गरेका थिए । उक्त फिल्म रिलिज हुन बाँकी छ ।
बलिउडमा ‘बप्पी दा’ भनेर चिनिने उनी लोकप्रिय हुने अर्को कारण उनले लगाएका गहना पनि थियो । त्यही कारण उनलाई ‘भारतको गोल्डमेन’ पनि भनिन्थ्यो ।
राजकुमारले भनेका थिए, ‘मंगलसूत्र पनि लगाउनु पथ्र्यो’
बप्पीले सुन लगाएको देखेर एकपटक अभिनेता राजकुमारले उनको मजाक उडाएका थिए । यो किस्सा एक पार्टीको हो । एक पार्टीमा बप्पीसँगको भेटमा अभिनेता राजकुमारले बप्पीलाई तलदेखि माथिसम्म हेरेर आफ्नै शैलीमा ठट्टा गर्दै सोधे–‘वाह, क्या सानदार ! १ एक से एक गहना लगाएका छौँ । मात्र मंगलसूत्रको कमी रह्यो । यो सुनेपछि बप्पी हेरेको हेरेकै भएका थिए ।
माइकल ज्याक्सनसमेत बप्पीका फ्यान
केही वर्षअघि बप्पी ‘द कपिल शर्मा शो’ मा पाहुनाका रूपमा आएका थिए । त्यहाँ उनले आफूले गलामा भगवान् गणेशको सुनको लकेट लगाएको देखेर विश्वविख्यात माइकल ज्याक्सनले तारिफ गरेको बताएका थिए । ‘एक कार्यक्रममा जब माइकल ज्याक्सनसँग भेट भयो, उनले मेरो गलामा भगवान् गणेशको लकेट देखे । अनि ‘फेन्टास्टिक, यो निकै सुन्दर छ’ उनले भने, ‘उनले मेरो गीत ‘जिम्मी जिम्मी’को पनि तारिफ गरेका थिए ।’
गिनिज बुकमा नाम
बप्पीले एउटा अनौठो रेकर्ड कायम गरेका छन् । सन् १९८७ मा उनले ३३ फिल्मका लागि करिब एक सय ८० गीत कम्पोज गरेका थिए । एकै वर्षमा यति धेरै गीत रेकर्ड गरेबापत ‘गिनिज बुक अफ द वल्र्ड रेकर्ड’मा नाम लेखाएका थिए ।
तीन वर्षको उमेरमा तबला बजाउन सिकेका उनले ११ वर्षको उमेरमै संगीत दिन नै शुरु गरेका थिए । १३ वर्षको उमेरमा बलिउडमा स्थान बनाउनका लागि कोलकाताबाट मुम्बई आएका थिए । उनले ४८ वर्षको करियरमा करिब पाँच सय फिल्ममा ६ हजार गीत कम्पोज गरेका थिए ।
यो पनि…
को बन्छन् लता मंगेशकरको सम्पत्तिको हकवाला ?
चर्चित भारतीय गायिका लता मंगेशकरको निधन
