कक्षा १२ को परीक्षा जेठभित्रै गर्ने बोर्डको तयारी

राष्ट्रिय परीक्षा बोर्डले कक्षा १२ को परीक्षा आगामी जेठमा सञ्चालन गर्ने तयारी गरेको छ । बोर्डका अध्यक्ष डा. महाश्रम शर्माले शैक्षिक क्यालेन्डरलाई प्रभावित नपार्ने गरी कक्षा १२ को परीक्षा जेठ महिनाभित्रै सक्ने तयारी भइरहेको जानकारी दिए ।

कोभिड–१९ को महामारीका कारण दुई वर्षयता कक्षा १२ को परीक्षा प्रभावित बन्दै आएको छ । ‘अब पनि शैक्षिक क्यालेन्डरलाई पछ्याएनौँ भने विद्यार्थीको भविष्य अन्योलमा पर्छ,’ उनले भने, ‘हामी शैक्षिक क्यालेन्डर नबिग्रने गरी परीक्षाको तयारी गरिरहेका छौँ ।’

त्यसो त बोर्डले कक्षा १२ को परीक्षातालिका केही दिनमै सार्वजनिक गर्ने डा. शर्माले जानकारी दिए । ‘स्थानीय निर्वाचनले परीक्षालाई केही प्रभावित बनाउन सक्छ,’ उनले भने, ‘हामी त्यसलाई मध्यनजर गर्दै परीक्षातालिका तयार गर्छौं ।’

कक्षा ११ को परीक्षा भने सम्बन्धित विद्यालयले नै गर्नेछ ।

बोर्डले आज (बिहीबार) वैशाख ९ गतेबाट हुने एसईईको परीक्षा तालिका सार्वजनिक गरेको छ ।

यो पनि…
त्रिविको स्थगित परीक्षा फागुनमा हुने
त्रिविकाे ४७औँ दीक्षान्त समाराेह (फाेटाे फिचर)