डन्डिफोरको कारण र ध्यान दिनुपर्ने कुराहरू

डन्डिफोर हाम्रो छालामा आउने एउटा सामान्य समस्या हो । ८० देखि ९० प्रतिशत मानिसलाई आफ्नो जीवनकालभरिमा डन्डिफोर आएको हुन्छ । अनुहारमा भएको डन्डिफोरले धेरैको आत्मविस्वास कम गर्छ । छालामा डन्डिफोर आएपछि चिन्तित हुनुभन्दा डन्डिफोर आउनै नदिनु नै राम्रो हुन्छ । कुनै एउटा कारणभन्दा पनि विभिन्न कारणहरूले डन्डिफोरको समस्या देखापर्छ । डन्फिोर आउने कारण हरू यसप्रकार छन् :

ग्रन्थीले धेरै चिल्लो उत्पादन गरेर

यौवन अवस्थामा पुगेपछि हरेक मानिसमा हर्मोनमा परिवर्तन आउँछ । जसले गर्दा हर्मोनले धेरै चिल्लो उत्पादन गर्छ र त्यसै कारणले डन्डिफोरको समस्या देखिन्छ ।

किटाणुको संक्रमण

हाम्रो छालामा हुने (प्रोपियोनि बैक्टीरियम एक्ने) नामक किटाणुले चिल्लो बनाउने ग्रन्थी बढाउने काम गर्छ जसले गर्दा पनि डन्डिफोरको समस्या हुने पर्छ ।

चिल्लो बनाउने ग्रन्थी ब्लक भएमा

हाम्रो छालामा हुने कोषहरू परिर्वतन भइरहेको हुन्छ । केही कारणले चिल्लो उत्पादन हुने ग्रन्थीको प्वालहरू बन्द भएको खण्डमा पनि डन्डिफोरको समस्या देखिन्छ ।

रासायनिक प्रक्रियाको कारण

यी तीन कारणले गर्दा छालामा विभिन्न किसिमको रासायनिक प्रक्रिया हुन्छ । जसले गर्दा छाला रातो हुने, पिप भरिने आदि समस्या हुन्छ जसले गर्दा पनि डन्डिफोर आउने गर्छ ।

अन्य कारण

– तनावको कारणले पनि डन्डिफोरको समस्या देखिने गर्छ
– बुबा आमालाई डन्डिफोरको समस्या छ भने छोराछोरीमा पनि यो समस्या हुन सक्छ । वंशाणुगत कारणले पनि डन्डिफोरको समस्या हुने गर्छ ।
– धेरै चिल्लो कस्मेटिकहरूको प्रयोगले यो समस्या निम्त्याउने तथा बढाउने गर्छ ।
– आजभोलि कोभिड–१९ का कारण लगातार मास्कको प्रयोगले गर्दा पनि डन्डिफोरको समस्या देखिने गरेको छ ।
– धेरै चिनी प्रयोग भएको खानेकुराको सेवनले पनि यो समस्या हुन्छ ।
– जंक फुडहरूको सेवनले पनि डन्डिफोरको समस्या देखिन्छ ।
– हर्मोन गडबडी भएको व्यक्तिमा पनि डन्डिफोर आउन सक्छ ।
– किटनाशक औषधि तथा विभिन्न रासायनिक औषधिको फ्याक्ट्रीमा काम गर्ने व्यक्तिमा पनि यो समस्या देखिन सक्छ ।

ध्यान दिनुपर्ने कुराहरू

डन्डिफोर विभिन्न किसिमको हुने भएकोले कुन किसिमको डन्डिफोर हो भन्ने कुराको जानकारी हुनु जरुरी हुन्छ । सामान्य किसिमको डन्डिफोर हो भने केही कुरामा ध्यान दिँदा डन्डिफोरको समस्यालाई कम गर्न सकिन्छ । तर, गम्भीर समस्या छ भने छालारोग विशेषज्ञको सल्लाहअनुसार उपचार गर्नुपर्छ ।

– छालालाई नियमित क्लिन्जिङ गर्ने ।
– चिल्लो हटाउने फेसवासको प्रयोग गर्ने ।
– तनाव कम लिने ।
– कुनै औषधिको असरलाई पत्ता लगाउने ।
– कस्मेटिकको प्रयोगको कारणले डन्डिफोर आए प्रयोग बन्द गर्ने
– जथाभावी औषधिको प्रयोग नगर्ने
– डाक्टरको सल्लाहअनुसार फेसवास, मोस्टराइजर तथा सनक्रिमको प्रयोग गर्ने ।
– हरियो सागपात, फलफुल र प्रसस्त मात्रामा पानी पिउने ।
– सन्तुलित आहार सेवन गर्ने ।
– दुग्द्यजन्य पदार्थको सेवन कम गर्ने ।
– डन्डिफोरलाई कोट्याउने तथा फुटाउने नगर्ने
– जिन्क पाइने खानेकुरा हरू खाने
–डन्डिफोरलाई समयमा उपचार नगर्दा के हुन्छ ?

डन्डिफोरको उपचार समयमा नगर्दा समस्या झन् बढेर जान्छ यसले हाम्रो दैनिक जीवनमा असर गर्छ । डन्डिफोर भएका व्यक्तिमा आत्मविश्वास कम हुने, डिप्रेसन, एन्जाइटीसमेत हुन सक्छ । त्यसैले, यसको समयमै उपचार गर्नुपर्छ ।

विशेष ध्यान दिनुपर्ने कुरा

रिर्पोडक्टिभ एजको महिलाले डन्डिफोरसम्बन्धी औषधिको सेवन गर्दा विशेष ध्यान पुर्याउनुपर्ने हुन्छ ।
यदि, महिलाले डन्डिफोरको औषधि सेवन गरिरहेका बेला गर्भ बसेमा बच्चालाई असर गर्न सक्छ । त्यसैले, औषधि सेवन गर्दा ध्यान दिनुपर्छ । चिकित्सकको सल्लाहबिना कुनै पनि औषधिको प्रयोग गर्नु हुँदैन ।

यो पनि…
जोर्नी दुख्छ ? बन्दागोभीले गर्छ औषधिको काम
यस्ता छन् स्तन क्यान्सर पत्ता लगाउने तरिका