३८ सय बढि शिक्षकको बढुवा विज्ञापन बुधबार

शिक्षक सेवा आयोगले भोलि बुधबार शिक्षक पदका लागि बढुवा खुला गर्ने भएको छ। प्राथमिक, निम्नमाध्यमिक र माध्यमिक तहको द्वितीय र प्रथम तहका लागि बढुवा खुला हुनेछ। आयोगका अनुसार आन्तरिक प्रतियोगितात्मक (२५ प्रतिशत) तर्फ ८६७ पद संख्या बढुवा खुला गरिँदैछ।

त्यस्तै कार्य सम्पादन मूल्यांक (७५ प्रतिशत) तर्फ दुई हजार ६२२ पद संख्यामा बढुवा खुला हुँदैछ। आयोगका सूचना अधिकारी (उपसचिव) सुदर्शन मरहट्ठाका अनुसार आन्तरिक प्रतियोगितात्मकतर्फ ३० दिनसम्मको म्याद हुने र त्यसपछि दोब्बर दस्तुर बुझाएर थप सात दिनसम्म आवेदन दिन सकिने छ। कार्य सम्पादन मूल्यांकनका लागि ३५ दिने म्याद दिइने छ।

आयोगका अनुसार प्राथमिक द्वितीयका लागि सात सय रूपैयाँ र प्रथमका लागि एक हजार रूपैयाँ, निम्नमाध्यमिक द्वितीयका लागि एक हजार र प्रथम द्वितीयका लागि एक हजार दुई सय रूपैयाँ तथा माध्यमिक द्वितीयका लागि एक हजार दुई सय रूपैयाँ र प्रथमका लागि एक हजार पाँच सय रूपैयाँ शुल्क तोकिएको छ ।