एलिना चौहानका फ्यान चुम्बन गर्नेदेखि सिरानीमा फोटो टाँस्नेसम्म
पछिल्लो समय चर्चामा रहेकी गायिका हुन् एलिना चौहान । कालीप्रसाद बाँस्कोटाको आवाज रहेको गीत ‘इन्स्टाको फोटो’ कभरमा (जवाफ) दिएर गाएको गीतबाट उनले धेरै चर्चा कमाउन सफल भइन् । त्यसपछि उनका गीतहरू लगातार हिट भए ।
पाँच दर्जन बढी गीतमा स्वर दिइसकेकी एलिनाका ‘मिनिरल वाटर’, ‘कुरा काट्ने मान्छेले काटून्’, ‘छेकेर माया छेकिन्न’, ‘मेरो परान’ लगायतका गीत चर्चित छन् । गीतहरू हिट भएलगत्तै उनको फ्यानहरू पनि ह्वातै बढेका छन् । आफ्ना धेरै फ्यानहरूमध्ये केही अनौठा फ्यानलाई उनी यसरी सम्झिन्छिन् :
सिरानी तथा भित्ताभरि मेरो फोटो टाँस्ने फ्यान
हेटौंडामा एक जना फ्यान हुनुहुन्छ सुस्मिता खड्का जसले सिरानीमा मेरो फोटो प्रिन्ट गर्नुभएको छ । उहाँको कोठाको भित्ताभरि पनि मेरो फोटो टाँस्नुभएको छ । उहाँ मलाई अलि अनौठो लाग्छ । धेरै फ्यानहरू मैले म्यासेजको रिप्लाई गरिन घमन्डी भनेर रिसाउनुहुन्छ । व्यस्तताको कारण मैले रिप्लाई नगर्दा पनि ती फ्यानले भने बारम्बार म्यासेज गरिरहनु हुन्छ ।
धेरै टिकटकहरूमा मेन्सन पनि गर्नुभएको रहेछ । एकपटक उहाँले मेन्सन गर्नुभएको भिडियो मैले हेरेँ त्यसमा उहाँले कोठाभरि मेरो फोटो टाँसिएको देखाउनुभएको रहेछ । रिप्लाई नगर्दा पनि उहाँले लगातार गरेको माया देखेर धेरै खुसी लाग्यो र केही समय अगाडि मैले उहाँलाई भेटेँ ।
अँगालो हालेर चुम्बन गर्ने फ्यान
केही समयअघिको कुरा हो । एउटा कार्यक्रमको शिलशिलामा दिल्ली गएको थिएँ । त्यहाँ स्टेजमा गीत गाइरहेको बेला एक जनामाथि स्टेजमाथि नै आउनुभयो र मलाई अंगालो हाल्नुभयो । गालामा चुम्बन पनि गर्नुभयो । कार्यक्रम सकाएर म होटलमा फर्किएँ । होटलमा पुगेर ऐना हेर्दा त मेरो गालाभरि लिपिस्टिकको दाग रहेछ ।
मेरै नामबाट टिकटक आइडी बनाएर चलाउने फ्यान
एक जना महिला फ्यान नै हुनुहुन्छ जस्ले मेरो नामको टिकटक आईडी बनाउनुभएको छ । उहाँको नाम आरोही हो । टिकटकमा मेरै फोटो, मेरै गीत र मेरै अन्तरवार्ता राख्नुहुन्छ । मेरो हरेक नयाँ गीत निक्लिनेबित्तिकै शुभकामना तथा प्रतिक्रिया दिनुहुन्छ । फेसबुकको हरेक फोटोमा कमेन्ट गर्नुहुन्छ । उहाँ पनि मलाई अलि अनौठो लाग्छ ।
‘बरीलै’ गीत सुनेर मात्र खाना खाने भाइ
एक जना सानो फ्यान हुनुहुन्छ जस्ले मेरो बरीलै गीत नसुनी खाना नै खानु हुन्न रे । उहाँको मम्मिले मलाई धेरैपटक फोन म्यासेज गरिरहनुहुन्छ । मेरो छोरो तपाईंको गीत नसुनी खाना नै खाँदैन के गर्ने होला भनेर गुनासो पनि गर्नुहुन्छ । ती सानो भाइ पनि मेरो अनौठो फ्यानभित्र नै पर्छन् ।
यो पनि पढ्नुहोस् :
ज्योती भन्छिन्– ‘फ्यानले ओठमा किस गर्दा बान्ता आयो’
सोनिकाका फ्यान– सुनको सिक्री गिफ्ट दिनेदेखि झम्टेर रुनेसम्म
