बी एण्ड सी र पूर्वाञ्चल क्यान्सर अस्पतालद्वारा ६७ परिवारको निःशुल्क स्वास्थ्य बीमा

बी एण्ड सी र पूर्वाञ्चल क्यान्सर अस्पतालले गरिब, विपन्न परिवारलाई निःशुल्क स्वास्थ्य बीमा गरेको छ । शनिबार अर्जुनधारा नगरपालिका–२ र ३ का ६७ परिवारका करिव ३ सय जनाको अस्पतालले निःशुल्क स्वास्थ्य बीमा गरेको हो । अस्पतालका अध्यक्ष दुर्गाप्रसाद प्रसाईँले अर्जुनधारा नरपालिकास्थित खुदुनाबारीमा आयोजित कार्यक्रममा ती विपन्न, गरिब परिवारलाई स्वास्थ्य बीमाको कार्ड वितरण गरेका हुन् । कार्यक्रममा संविधानसभा सदस्य प्रेम गिरीले गरिब, आर्थिक अवस्था कमजोर भएका व्यक्ति बिमाको पहुँचमा पुग्न नसकेकाले अस्पतालले बीमा गरिदिएर स्वास्थ्य सेवा पाउने बताए ।

अस्पतालका अध्यक्ष प्रसाईँले सामाजिक उत्तरदायित्वअनुसार गरिब, विपन्न परिवारलाई आफूले निःशुल्क बिमा गरेको बताए । उनले गरिब, आर्थिक अवस्था कमजोर भएर स्वास्थ्य बीमा गर्न नसकेका त्यस्ता नागरिकलाई बीमा गरेर स्वास्थ्यमा पहुँच पु¥याउन थालिएको समेत बताए । ६७ घरपरिवारका करिब ३०० व्यक्तिले वार्षिकरूपमा निःशुल्क रु एक लाख बराबरको स्वास्थ्योपचार पाउनेछन् ।

उनकाअनुसार यस वर्ष अस्पतालले गरिब, विपन्न, आर्थिक अवस्था कमजोर भएका एक हजार परिवारलाई स्वास्थ्य बीमा निःशुल्क गरिदिने बताए । अर्जुनधारा नगरपालिका वडा नं २ का अध्यक्ष रघु खनालले अर्थावस्था कमजोर भएका व्यक्तिले बीमाको रकम तिर्न नसकेर स्वास्थ्य सेवाबाट बञ्चित हुनुपरेको अवस्थामा अस्पतालले निःशुल्क बीमा गरिदिएर स्वास्थ्य सेवा प्रदान गरेकोमा आभार व्यक्त गरे । बिमितले एक वर्षसम्म रु एक लाख बराबरको स्वास्थ्य सेवा निःशुल्क अस्पतालबाट पाउनेछन् ।

अस्पतालका अध्यक्ष प्रसाईँले ती बिमितको वार्षिकरूपमा अस्पतालले नै नवीकरण गर्ने जानकारी दिए । एक घर परिवारमा रु तीन हजार ५०० मा बिमा गरे एक वर्षसम्म रु एक लाख बराबरको स्वास्थ्य सेवा पाइने गरिन्छ । सरकारले विसं २०७२ देखि कैलाली जिल्लाबाट स्वास्थ्य बीमा कार्यक्रम सुरु गरेको हो । अहिले ७५ जिल्लामा बीमा कार्यक्रम सञ्चालन भएको छ ।

अस्पतालले स्वास्थ्य बीमा गरिदिएपछि त्यहाँ स्थानीय उत्साहित भएका छन् । खुदुनाबारीकी बिष्णुमाया कुमाल बी एण्ड सी अस्पतालले आफ्नो परिवारको स्वास्थ्य बीमा गरिदिएकोमा निकै खुशी देखिन्थिन् । उनलाई यसअघि यस बीमाको बारेमा खासै थाहा रहेनछ । स्वास्थ्य बीमा गरेपछि परिवारका सदस्यको १ लाख रुपैयाँसम्म निःशुल्क स्वास्थ्य बीमा हुन्छ भन्ने थाहा पाएपछि उनी फुरुंग छिन् । ‘स्वास्थ्य बीमामात्र होइन हामीलाई कुनै पनि बीमाको बारेमा थाहा छैन,’ उनले भनिन्, ‘थाहा पाएपनि हामीसँग बीमा गर्ने हैसियत हाम्रो थिएन ।’ ३५ वर्षीया कुमालको ३ जना छोरछोरी छन् । बिहानबेलुकाको गुजारा टार्न श्रीमान मिस्त्री काम गर्छन् ।

यसैगरी, मनमाया थापा केही महिनाअघि गाउँमा आएको स्वास्थ्य शिविरमा गइन् । पाठेघरमा क्यान्सर हुन लागेको चिकित्सकले उनलाई सुनाए । त्यसपछि निकै आत्तिइन् निराश बनिन् । ‘अब क्यान्सर नै भएपनि के गर्नु आफूसँग उपचार गर्ने पैसा थिएन,’ उनी भन्छिन्, ‘अब त मेरो परिवारकै स्वास्थ्य बीमा भयो, त्यसैले क्यान्सरको पनि उपचार गराउँछु ।’

खुदुनाबारीकै इन्द्रा सुवा मधुमेह, युरिकएसिड, थाइरोइड, ब्लड प्रेसरबाट पीडित छिन् । बिहान बेलुका छाक टार्नै धौ–धौ पर्ने सुवालाई औषधिमुलो गर्ने खर्च जुटाउन गाह्रो छ । थुपै्र रोगको सिकार बनेकी उनलाई कतिबेला के हुने हो ठेगान छैन । यद्यपि, स्वास्थ्य बीमापछि भने आर्थिक अभावमा ज्यान गुमाउनु पर्दैन भन्ने ढुक्क भएको उनी बताउँछिन् । ‘मलाई लाग्न बाँकी रोग केही छैन,’ उनी भन्छिन्, ‘अब त रोग लागेपनि म सँग स्वास्थ्य बीमा छँदै छ नि ।’