अभिनेता विपिन कार्कीका ४ अनौठा फ्यान

थिएटरबाट अभिनय यात्रा सुरु गरेका अभिनेता विपिन कार्की चलचित्र पशुपती प्रसादबाट थप चर्चामा आए । बहुमुखी प्रतिभाले धेरै दर्शकको मन जित्न सफल कार्कीका सबै चलचित्र दर्शकले रुचाएका छन् । हरेक चलचित्रमा फरक अभिनय, बेग्लै लवजमा प्रस्तुत हुन सक्नु कार्कीको अब्बल पक्ष हो । त्यसैले उनले थुप्रै समर्थक अर्थात फ्यान कमाएका छन् । तिनैमध्येका ४ जना फ्यानलाई उनले यसरी सम्झिए ।

मेरो गाडीले ठक्कर दिँदा पनि केही नभन्ने फ्यान

केही समय अघि कामको सिलसिलामा म कतै जाँदै थिए । एकजना भाईलाई मेरो गाडीले टक्कर दियो । सामान्य चोट मात्र लागेको थियो तर, म धेरै डराएँ । के गर्ने होला भनेर सोच्न थाले । उसले मदिरा पनि सेवन गरेको थियो । एकदमै रिसाएर पिटौँला झैँ गरि ऊ मतिर आयो । उसले जब मलाई देख्यो ऊ एक्कासी शान्त भयो र भन्यो ‘म तपाईको एकदम ठुलो फ्यान हुँ दाई चिनिन सरी ।’ त्यसपछि मैले उसलाई अस्पताल जाम भनेर अनुरोध गरें तर, मान्दै मानेन । तपाईंको गाडीमा आएर ठोक्किन पाउनु नै मेरो अहो भाग्य हो दाई भनेर न अस्पताल गयो न प्रहरीलाई नै खबर गर्यो । त्यसैले मलाई ती भाई अनौठा फ्यान लागेको थियो । जसले एउटा संकटको घडीमा मेरो अभिनयलाई माया गरेर झमेलाबाट बचाए ।

मलाई भेट्नकै लागि नेपालगञ्जबाट काठमाडौं आउने फ्यान

करिव एक वर्ष अघिको कुरा हो । नेपालगञ्जको एकजना फ्यानले मेरो नम्बर कताबाट पाएर मलाई फोन गरेर असाध्यै भेट्न मन छ भन्नु भयो । उहाँले धेरै पटक रिक्वेस्ट गरेपछि मैले पनि भेट्ने निधो गरेँ । मसँग धेरै समय थिएन सुटिङ्गमा नै व्यस्त थिएँ । मैले १० मिनेटका लागि एउटा क्याफेमा भेट्नको लागि समय मिलाएँ । त्यहाँ १०, १५ मिनेट भेटेपछि उहाँ नेपालगञ्ज फर्किहाल्नुभयो ।

फेसबुकमा साथी बनाउनुस् न भन्ने फ्यान

मलाई तपाईसँग भेट्न मन छ, कुरा गर्न मन छ भन्ने फ्यानहरु त धेरै छन् । फेसबुकमा तथा अन्य सोसल मिडियाहरुमा साथी बनुम् न भन्ने पनि धेरै । त्यस्तै एकजना फ्यान थिइन् जो मलाई फेसबुकमा साथी बनाउँनुस् न भनेर धेरैपटक रिक्वेस्ट गर्थिन् । फेसबुकमा जम्मा ५ हजार जनालाई साथी बनाउन मिल्छ । चर्चामा आउनुभन्दा पहिला नै मेरो फ्रेन्ड लिस्ट भरिएको थियो । अब चिनजानका साथीलाई हटाएर नयाँ साथी बनाउने कुरा भएन ।

नातिको नाम नै भस्मे डन राख्ने ती प्रिन्सिपल

केही समय अघि स्कुलको एउटा कार्यक्रममा उपस्थितिको लागि निमन्त्रणा आएको थियो । म त्यस कार्यक्रममा सहभागी भएँ । त्यसै स्कुलको प्रिन्सिपलले आफ्नो नातिको नाम नै भस्मे डन राख्नुभएको रहेछ । भेटमा मलाई भन्नुभयो ‘मलाई तपाईको भस्मे डन वाला क्यारेक्टर यति धेरै मन प¥यो कि मैले अमेरिकामा भएको आफ्नो नातिको नाम नै भष्मे डन राखेको छु । मेरो परिवारको अन्य सदस्यहरुलाई पनि तपाईं असाध्यै मनपर्छ । त्यसैले नातिलाई सबैले भष्मे डन भनेर नै बोलाउँछन् ।’ उहाँको कुरा सुनेर धेरै खुसी लाग्यो । मलाई यती धेरै माया र सम्मान गर्ने फ्यानहरु पनि रहेछन् ।

यो पनि पढ्नुहोस्
विराट भट्टका फ्यानः मोवाइल फुटाउनेदेखि घरका भित्ताभरि फोटो टाँस्नेसम्म
म्याकुरीका फ्यान : सेल्फी खिच्न ओभरटेक गर्नेदेखि प्रहरी चौकी पुर्याउनेसम्म
मोडल सरोज अधिकारीका फ्यान: ढोकामा कुर्ने देखि, प्रेमप्रस्ताव राख्नेसम्म
दुर्गेश थापाका ५ अनौठा फ्यान
खुइलीका फ्यान– बुहारी बनाउनेदेखि कोठा भाडा तिरिदिन्छु भन्नेसम्म
आश्माका फ्यान : प्रेमप्रस्ताव राख्नेदेखि आश्मा चाहियो भन्दै रुनेसम्म