सुबिन भट्टराईको नजरमा पढ्नै पर्ने ३ पुस्तक

सुबिन भट्टराई एक उत्कृष्ट युवा लेखकका साथै पुस्तक प्रेमी व्यक्ति हुन् । उनलाई खाली समयमा पुस्तक पढेर समय बिताउन असाध्यै मन पर्छ । उनले धेरै उत्कृष्ट पुस्तकहरु पढिसकेका छन् । यदि तपाईं फुर्सदिलो हुनुहुन्छ र पुस्तक पढेर समय बिताउने सोंचमा हुनुहुन्छ भने भट्टराईको नजरमा पढ्नै पर्ने तीन पुस्तक यस्ता छन् :

घामका पाइलाहरु

घामका पाइलाहरू धनुषचन्द्र गौतमद्वारा लेखिएको र साझा प्रकाशनले बजारमा ल्याएको एक नेपाली भाषाको उपन्यास हो । यस उपन्यासले वि.सं २०३५ को मदन पुरस्कार प्राप्त गरेको थियो । यस पुस्तकमा प्रयोग भएका भाषा शैली एकदमै सरल छ ।
त्यसैले सबैले यो पुस्तक सजिलै पढ्न र बुझ्न सक्छन् । यस उपन्यासमा प्रस्तुत भएका सबै पात्रहरु सम्झन लायक छन् । त्यसैले मैले पढेको पुस्तकहरु मध्ये मलाई यो एकदमै राम्रो लाग्छ ।

हिटलर र यहुदी

हिटलर र यहुदी नेपाली सुप्रसिद्ध मनोवैज्ञानिक साहित्यकार विश्वेश्वरप्रसाद कोइरालाद्वारा लेखिएको उपन्यास हो । जर्मन तानाशाह हिटलरले लाखौं निर्दोष यहुदीहरूलाई ग्याँस च्याम्बरमा थुनेर मारेको घटनाको आधारमा यो उपन्यास लेखिएको छ । कोइरालाको लेखन शैलीको त तारिफ गरेर कहिल्यै सकिँदैन । उहाँको भाषाशैली देखि विषयवस्तु सबै उत्कृष्ट छ । यो पुस्तक पनि मैले पढेका मध्ये उत्कृष्ट लाग्छ ।

आगत

भवानी भिक्षुको उपन्यास आगत पनि उत्कृष्ट पुस्तकहरुको सुचीमा पर्छ । अहिलेको पाठकहरुलाई यो पुस्तकको भाषा बुझ्न अलि गाह्रो हुन सक्छ । तर, पढ्दै गएपछि सजिलो लाग्न थाल्छ । राणाकालमा जमिन्दारीको कथालाई पुस्तकले उत्थान गरेको छ । यो धेरै अगाडी लेखिएको पुस्तक हो । तर, त्यति पुरानो राणा कालको कथा भइकन पनि प्रगतिशील कथा यस भित्र पाइन्छ । यो पुस्तकमा एकजना पात्र छिन् सम्झना जस्को भुमिकालाई कहिल्यै बिर्सन सक्दिनँ ।