नायिका सुस्मा कार्कीको नजरमा पढ्नै पर्ने ३ पुस्तक

नायिका सुस्मा कार्कीलाई पुस्तक पढ्न धेरै मन लाग्छ । अझ निषेधाज्ञाको फुर्सदको यो बेला उनलाई पुस्तक पढ्ने समय पर्याप्त भएको छ । उनलाई अन्य रचनात्ममक कार्य गर्न पनि धेरै मन पर्छ । तपाई पनि यदि निषेधाज्ञाको यो बेला फुर्सदमा हुनुहुन्छ र के गर्ने भन्ने दोधारमा हुनुहुन्छ भने पुस्तकहरु पढेर समय व्यतित गर्न सक्नुहुन्छ ।

नायिका सुस्मा कार्कीलाई मन पर्ने तीन पुस्तकः

श्रीमद्भगवतगीता

मैले पढेका पुस्तकहरुमा तीन पुस्तक छान्नुपर्दा पहिलो नम्बरमा श्रीमद्भगवतगीता पर्छ । यो पुस्तक पढेर मैले जीवन दर्शन के हो यसलाई कसरी सरल बनाउने भन्ने कुरा बुझेकी छु । व्यवहार, जीवन र कर्म कस्तो हुनुपर्छ भन्ने कुरा यसमा देखाइएको छ । सारा जीवनका लागि चाहिने कुराहरू यसमा छन् । यो पुस्तक एक पटक पढ्दा एउटा नयाँ कुरा सिकिन्छ भने अर्को पटक पढ्दा अर्को नयाँ कुरा सिक्न पाइन्छ । त्यसैले पनि यो पुस्तक सबैले एकपटक पढ्नैपर्छ ।

वेद

दोस्रो नम्बरमा वेदलाई लिन्छु । वेदमा जीवनमा लागू हुने सबै कुरा छ । हामी कहाँबाट आएका हौ कहाँ जानु छ र हामी के हौँ भन्ने कुरा बझ्न यो पुस्तक सबैले पढ्नै पर्छ ।

गरुड पुराण

यो गरुड पुराण घरमा राख्न हुँदैन, छोरी मान्छेले पढ्न हुँदैन भनिन्छ । मृतकको घरमा १३ दिनसम्म यो किताव पढिन्छ । पण्डितले ल्याएर पढेर फेरि फिर्ता लग्ने चलन हुन्छ । तर, यस पुस्तकमा भएको ३/४ वटा अध्याय पण्डितले पढ्न छुटाउँदा रहेछन् । मानिस जीवित हुँदा नै उसको सेवा गर्नुपर्छ मृत्यु पछि दिइएको कुराहरु उसले केही पनि पाउँदैन भनेर पुस्तकमा भनिएको छ । मैले पढेका मध्ये यो पनि एउटा उत्कृष्ट पुस्तक हो ।