मनै लोभ्याउने बराह ताल (भिडियो पनि)

मेरो लाइफस्टाइल || 17 March, 2023

घना जंगल, चारैतिर हरियाली डाँडाको बीचमा सुन्दर ताल। ताल छेउछाउमा पातलो बस्ती, तालजस्तै निश्चल मन भएका मान्छे । तालजस्तै शान्त गाउँ । मौसम खुलेको समयमा हरेक बिहान तालमा चुरेन, पुतली, मानापाथी र धवलागिरि हिमालले पौडी खेल्छन्।

पश्चिम म्याग्दीको मालिका गाउँपालिका–१, निस्कोटमा अवस्थित निस्कोट सामुदायिक वनको पुछारमा रहेको बराह ताल करिब २ रोपनी क्षेत्रफलमा उत्तर पश्चिम भएर फैलिएको छ । क्षितिजमा धवलागिरि हिमाल देखिन्छ भने सोही हिमालको प्रतिबिम्ब तालमा देख्दा यहाँ पुग्ने जो कोहीको मन लोभिन्छ । गाउँको सिरानमा र जंगलको पुछारमा रहेको यो ताल कहिल्यै पनि फोहोर नहुने स्थानीयहरू बताउँछन् । यहाँ जंगलका पात पतिङ्गर परिहाले भने चराले चुच्चोले टिपेर बाहिर फ्याँक्ने गरेको उनीहरूको भनाइ छ ।

समुन्द्री सतहदेखि २ हजार ३ सय मिटरको उचाइमा अवस्थित बराह ताल क्षेत्रबाट संसारको सातौँ तथा नेपालको दोस्रो अग्लो चुचुरो धौलागिरि हिमालको साथै गुर्जा, निलगिरी, अन्नपूर्ण, माछापुच्छ्रे र मानापाथी लगायतका आधा दर्जन भन्दा बढी हिमाल र मनोरम दृश्यहरूको प्रत्यक्ष रूपमा अवलोकन गर्न सकिन्छ । रोमाञ्चक भू–बनोट, हरियाली र विविधतायुक्त सुन्दर गाउँ, मनमोहक प्रकृति र बराह तालले अहिले पर्यटकहरूलाई पर्खिरहेको छ ।

निस्कोट गाउँको डाँडाबाट छिमेकी ओखरबोट, रुमलगायत अन्य गाउँको आकर्षक दृश्य देखिन्छन् । निस्कोट गाउँ पर्यटनका साथसाथै कला र संस्कृतिमा पनि धनी छ। मगर समुदायको बाहुल्यता रहेको निस्कोटमा लोपोन्मुख यानीमाया, सुनीमाया, सालैजोजस्ता गीतहरू सुन्न पाइन्छ। बराह ताल र निस्कोट गाउँको सुन्दरताले पर्यटकको मन लोभ्याइरहन्छ।

पर्यटकीय महत्त्व बोकेको बराह ताल संरक्षणका लागि यसअघि साबिक निस्कोट गाविसले तालसम्म पुग्ने पदमार्ग, तालको सुरक्षाका लागि घेरा बार निर्माण र छिमेकी बागलुङ जिल्लाको सिमाना ताराखोलाको धुरीसम्म पुग्न पदमार्ग निर्माण गरेको थियो । ताल पुरिएर साँघुरिएको छ । वरपरको जमिनलाई खनेर मूलको पानीलाई व्यवस्थापन गरेर ताललाई फराकिलो बनाउन सकियो भने बराह ताल सुन्दर पर्यटकीय स्थल बन्ने छ ।

बराह ताल पुग्नको लागि काठमाडौँबाट पोखरा हुँदै बेनी २८२ किलोमिटर, बेनीबाट दरबाङ २४ किलोमिटर। दरबाङबाट ९ किलोमिटरमा निस्कोट गाउँ पुग्न सकिन्छ । तालको किनारासम्म जिप पुग्छन्, यद्यपि दरबाङबाट करिब चार–पाँच घण्टाको पैदल यात्रामा पनि बराह ताल पुग्न सकिन्छ ।