एकैपटक २३ सय भन्दा धेरैलाई कोरोना, काठमाडौं उपत्यकामा मात्रै एक हजार बढी संक्रमित

बुधवार मात्र देशभर २ हजार ३५१ जनामा कोरोना संक्रमण पुष्टि भएको छ । नेपालमा गत सोमवारदेखि आजसम्म २३ हजार ९ सय पीसीआर परीक्षण भएकोमा ५ हजार ११४ जनामा कोरोना संक्रमण पुष्टि भएको छ । यस अवधिमै ७ सय ९३ जना कोरोना संक्रमण मुक्त भएका छन् भने अहिले नेपालमा सक्रिय संक्रमितको संख्या १० हजार ५८१ रहेको छ ।

त्यस्तै संस्थागत आइसोलेसनमा ८३६ र होम आइसोलेसनमा ९ हजार ४४६ जना रहेको स्वास्थ्य तथा जनसंख्या मन्त्रालयका प्रवक्ता डा जागेश्वर गौतमले जानकारी दिए । त्यस्तै देशभर आज ८ हजार ८४४ जनाको पीसीआर नमूना परीक्षण भएका छन् भने ८०३ जनाको एन्टीजेन परीक्षण भएको छ । गत २४ घण्टामा पीसीआर विधिबाट २ हजार २ सय २० र एन्टीजेन विधिबाट १३१ जनामा कोरोना संक्रमण पुष्टि भएको हो । योसँगै बुधवार नेपालमा २ हजार ३५१ जनामा कोरोना संक्रमण पुष्टि भएको हो । गत चौबीस घन्टामा कोरोना संक्रमणबाट १० जनाको मृत्यु भएको छ । योसँगै नेपालमा मृत्यु हुनेको संख्या ३ हजार ११२ पुगेको छ ।

बुधवार काठमाडौं उपत्यकाभित्र भक्तपुरमा ८४, ललितपुरमा १८१ र काठमाडौंमा ७८६ जना गरी १ हजार ५१ जनामा कोरोना संक्रमण पुष्टि भएको हो । देशभर अहिले ८६ जना क्वारेन्टाइनमा रहेका छन् । त्यस्तै गत २४ घण्टामा कोरोना संक्रमण मुक्त हुनेहरुको संख्या २८७ रहेको छ भने १८० जना आइसीयू र ४७ जना भेन्टिलेटरमा रहेका छन् ।