युद्धबारे जर्मनी, फ्रान्स र बेलायतलाई जेलेन्स्कीले के भने ?

युक्रेनका राष्ट्रपति भोलोदिमिर जेलेन्स्कीले फ्रान्सले आफ्नो देशलाई सैन्य सहयोग उपलब्ध गराउन आनाकानी गरिरहेको बताएका छन् ।

द इकोनोमिस्टसँगको अन्तर्वार्ताको क्रममा युक्रेनी राष्ट्रपति जेलेन्स्कीले रूसको आक्रमणलाई लिएर पश्चिम युरोपेली देशहरूले कस्तो सहयोग गरिरहेका छन् वा छैनन् भन्नेबारे बताएका हुन् ।

अन्तर्वार्ताको क्रममा जेलेन्स्कीले फ्रान्सका राष्ट्रपति इम्यानुएल म्याक्रोँको कडा विरोध गरेका हुन् । म्याक्रोँ सैन्य सहयोग प्रदान गर्न असफल रहेको र त्यसको कारण उनी रूससँग डराउनु रहेको जेलेन्स्कीले बताएका छन् । ‘उनीहरू रूससँग डराएका छन्, कुरा स्पष्ट छन्’, उनले भने ।

बेलायती प्रधानमन्त्री बोरिस जोन्सन भने हतियार सहयोग गर्न सकारात्मक रहेको र अहिलेसम्म आफ्नो संविधान तथा कानुनी व्यवस्थाले दिएसम्म सहयोग गरिरहेको जेलेन्स्कीले बताए ।

उनले भनेका छन्, ‘स्पष्ट रूपमा भन्दा जोन्सन सहयोग गर्न इच्छुक नेता हुन् । उहाँ सहयोगका सवालमा उदाहरणीय देखिनु भएको छ । पक्कै पनि बेलायत हाम्रो पक्षमा छ । उसले अहिलेको अवस्थामा अर्को विकल्पको खोजी पनि गरेको छैन ।’

जेलेन्स्कीका अनुसार जर्मनीले भने आफूलाई सन्तुलित गर्ने प्रयास गरिरहेको छ । रूससँग जोडिएको लामो इतिहास रहेको र आर्थिक सम्बन्ध पनि सीधा भएकाले उनीहरूले अहिलेको अवस्थालाई आफ्नो अनुकूल हुने गरी सन्तुलित रूपमा प्रक्रिया दिने प्रयास गरिरहेको जेलेन्स्कीले बताएका हुन् ।

यो पनि…
पुटिन रहन सक्दैनन् : बाइडेन
युक्रेन र रूसबीच मंगलबार टर्कीमा वार्ता हुने