रूसी आक्रमण सामना गरिरहेका युक्रेनी राष्ट्रपति भोलोदिमिर को हुन् ?

यतिबेला विश्वको ध्यान युक्रेन र रसियामा केन्द्रित छ । युक्रेनले रूसी आक्रमण सामना गरिरहेको छ । अन्तर्राष्ट्रिय सञ्चार माध्यमहरूले जनाएअनुसार रूसी आक्रमणमा तीन बालबालिकासहित १९८ युक्रेनी नागरिक मारिएका छन् ।

३३ बालबालिकासहित थप १ हजार ११५ जना घाइते भएको उनीहरूले जनाएका छन् । रूसी सेना पूर्वी, दक्षिणी र उत्तरी सीमानाका बिन्दुबाट युक्रेन छिरिसकेका छन् । रूस र युक्रेनबीच विगत आठ वर्षदेखि तिक्ततापूर्ण सम्बन्ध छ ।

सन् २०१४ मा रूसले छिमेकी देशमा राजनीतिक उथलपुथलको फाइदा उठाउँदै युक्रेनको दक्षिणी क्रिमिया प्रायद्वीपमा सैन्य नियन्त्रण कायम गर्न थालेको थियो । युक्रेनको सेना र रूसी समर्थित विद्रोहीबीच पूर्वी युक्रेन दोनबासमा भने कहिल्यै युद्ध समाप्त भएन ।

युद्धमा अहिलेसम्म १४ हजार मानिसहरूको मृत्यु भएको अन्तर्राष्ट्रिय सञ्चार माध्यमहरू बताउँछन् । रूसी आक्रमणको सामना गर्न राष्ट्रपतिदेखि आधुनिक हतियार बोकेका स्वयंसेवकसम्म युद्ध मैदानमा आएका छन् ।

रूसी आक्रमणको तेस्रो दिन युक्रेन सरकारले राजधानी किएभका चोकहरूमा संघर्ष जारी राखेको छ । केही आवासीय क्षेत्रहरू पनि आक्रमणमा परेका छन् ।

राजधानीतर्फ केन्द्रित हुँदै गरेका रूसी सेनालाई रोक्न युक्रेनले सेना परिचालन गरेको छ भने नागरिकहरूलाई हतियार वितरण गरिएको छ ।

युक्रेनी राष्ट्रपति भोलोदिमिर जेलेन्स्कीले युक्रेन छोडेर सुरक्षित स्थानमा जान गरिएको अमेरिकी प्रस्ताव अस्वीकार गरेका छन् । उनी आफैंं किएभका सडकमा देखा परेका छन् । उनले युक्रेनको प्रतिरक्षा गरिने वाचा दोहोर्‍याएका छन् ।

भोलोदिमिर जेलेन्स्की
भोलोदिमिर जेलेन्स्कीले युक्रेनको राष्ट्रपतिमा निर्वाचित हुनुअघि एक टेलिभिजनमा राष्ट्रपतिको भूमिका निभाएका थिए । सायद उनलाई यो थाहा थिएन होला कि एकदिन वास्तवमै युक्रेनको राष्ट्रपति बन्नेछु । जेलेन्स्की त्यो समयमा अभिनेता र स्ट्यान्ड अप कमेडियन थिए ।

उनी युक्रेनको सबैभन्दा लोकप्रिय कलाकारमध्ये एक हुन् । उनले अन्य कलाकारसँग मिलेर सन् १९९७ मा कमेडी ग्रुप ‘क्वार्टल ९५’ बनाएका थिए । यो ग्रुप पनि चर्चामा छ । यो समूहले टेलिभिजन कार्यक्रमहरू उत्पादन गरेको थियो ।

जेलेन्स्कीले आफ्नो एउटा कार्यक्रममा विद्यालय शिक्षकको भूमिका पनि निभाएका थिए । सो कार्यक्रममा शिक्षक एकदिन युक्रेनको राष्ट्रपति बन्नुपर्ने देखाइएको थियो । सन् २०१९ को चुनावमा आश्चर्यजनक जित निकाल्दै जेलेन्स्की युक्रेनको राष्ट्रपतिमा निर्वाचित भएका थिए । जेलेन्स्कीको जीवन अन्य अन्तर्राष्ट्रिय नेताहरूको तुलनामा सामान्य छ । जसको पुष्टि युक्रेनी जनताले नै गरेका छन् ।

उनले राष्ट्रपति पद सम्हालेपछि धेरै संकटको सामना गरिरहनु परेको छ । तर उनले दृढताका साथ संकटहरूको सामना गरिरहेका छन् । जेलेन्स्की विवाहित हुन् र उनकी पत्नीको नाम ओलेना जेलेन्स्की हो । उनीहरूका सन्तान पनि छन् ।

जेलेन्स्कीले सर् २००० मा किभ राष्ट्रिय आर्थिक विश्वविद्यालयबाट कानुनमा डिग्री गरेका छन् । सन् २०१८ मा अचानक राजनीतिमा प्रवेश गरेका उनी ‘जनताको सेवक’ पार्टीबाट राष्ट्रपतिको लागि उम्मेदवारी घोषणा गरेका थिए ।

राष्ट्रपति बनेदेखि जेलेन्स्कीको अमेरिकासँगको सम्बन्ध निकै राम्रो रहेको छ । त्यसको पुष्टि हाल जारी रूसी आक्रमणको बेला अमेरिकाले गरेको छ । अमेरिकाले राष्ट्रपति जेलेन्स्कीलाई उद्धार गर्ने प्रस्ताव गरेको थियो । सो प्रस्तावलाई जेलेन्स्की भने अस्वीकार गरिसकेका छन् ।

यद्यपि जेलेन्स्कीले राष्ट्रपति बनेपछि रूसी राष्ट्रपति भ्लादिमिर पुटिनसँग सुरुमा कूटनीतिक सम्बन्ध राख्ने प्रयास गरेका थिए । तर त्यसमा उनी सफल हुन सकेनन् । उनले युक्रेनमा भिक्टर मेदवेदचुकलगायत रूस समर्थक राजनीतिक समूहहरूविरुद्ध कडा कदम चालेका थिए । हाल उनै राष्ट्रपति जेलेन्स्की बन्दुक बोकेर देश र देशवासीको रक्षार्थ सडकमा ओर्लिएएका छन् । उनको विश्वसमुदायले प्रशंसा गरेका छन् ।

यो पनि
युक्रेन मामिलामा हस्तक्षेप गरे आणविक हतियार प्रयोग गर्छौ : रुस